طالبان وايي، په هرات ولایت کې یې ۲۸۵ جوړ شوي کورونه زلزله ځپلو ته سپارلي دي
د طالبانو تر کنټرول لاندې افغاني سرې میاشتې خبر ورکړی، چې د دغې ټولنې لهخوا ۲۸۵ کورونه د هرات ولايت زلزله ځپلو ته سپارل شوي دي.
د طالبانو تر کنټرول لاندې افغاني سرې میاشتې خبر ورکړی، چې د دغې ټولنې لهخوا ۲۸۵ کورونه د هرات ولايت زلزله ځپلو ته سپارل شوي دي.
دغې ټولنې پر اېکس پاڼه لیکلي، چې دغه تازه جوړ شوي کورونه د هرات ولایت د ګلران ولسوالۍ په شکر اب، بند افضل او سنګ کوتل سيمو کې او ۳ کورونه په زندهجان ولسوالۍ کې زلزله ځپلو ته سپارل شوي دي.د دغې ټولنې په وینا، د دغو کورونو په جوړولو څه د پاسه ١٠٢ مېليونه افغانۍ لګښت راغلى چې په هر کور ( ٣۵۶۵۰۰) مصرف شوى دی.د طالبانو تر کنټرول لاندې د افغاني سرې میاشتې مشر شهابالدین دلاور د کورونو د وېش په تړاو جوړه شوې غونډه کې د ګډون لپاره هرات ولایت ته تللی و.تر دې وړاندې طالبانو د لړم په لومړۍ نېټه ویلي و، چې دغې ډلې په غور ولایت کې سېلاب ځپلو ته سل کورونه سپارلي دي.طالبانو تر دې وړاندې هم ادعا کړې وه، چې په ځینو ولایتونو کې یې سېلاب ځپلو او زلزله ځپلو لپاره کورونه جوړ کړي؛ خو خلکو یې بیا د وېش په برخه کې شکایت لاره، چې پر اړمنو کسانو نه دي وېشل شوي او هغوی لاهم په خېمو کې شپې سبا کوي.تر دې وړاندې یو شمېر نا دولتي بنسټونو هم په هرات کې د زلزله ځپلو خلکو لپاره د کورونو د جوړولو په اړه بېلابېلې ادعاوې کړې وې،؛خو سیمهییزو خلکو د کورونو د وېش په بهیر کې د طالبانو پر کمزوري مدیریت نېوکې کړې او وایي، چې دوی له څه د پاسه یو کال له تېرېدو وروسته هم له بې کورۍ او لالهاندیو نه دي ژغورل شوي.
