شخړه د پنجشنبې په ماښام د مکابي تل ابیب او اژاکس امستردام ترمنځ د فوټبال سیالۍ دمخه پیل شوه. په ټولنیزو رسنیو کې خپرې شوې ویډیوګانې ښيي چې دواړه لوري د عربو او اسراییل ضد شعارونه ورکوي.
د متحده ایالاتو ولسمشر جو بایډن دا شخړه "په امستردام کې د اسراییل په پلویانو باندې بریدونه" بللي او دا یې « کرکه پارونکې» یاد کړي. جو بایډن پر اېکس پاڼې پیغام کې ویلي، چې هغه د اسراییل او هالنډي چارواکو سره په تماس کې دی. هغه ټینګار وکړ، چې هغه د هالنډ د چارواکو د ژمنې ستاینه کوي چې د دې پیښې عاملینو سره حساب کوي.
د امستردام ښاروال فمکه هالسما وویل، چې په دې ښار کې د درېیو ورځو لپاره مظاهرې منع دي.
د فرانسې ولسمشر امانویل مکرون دا برید "په تاریخ کې تر ټولو توره شیبه" وبلله او ټینګار یې وکړ، چې د هغه هېواد به د "یهودیت ضد" کړونو پر وړاندې مبارزې ته دوام ورکړي.
جرمن چارواکو دغه شخړې «شرمناکه» او د نه منلو وړ بللي دي. د جرمني لومړی وزیر او د بهرنیو چارو وزیرې په اروپا کې د یهودانو پر امنیت ټینګار وکړ.
د اروپایي کمېسیون مشرې اروسولا فون در لاین وویل: "په اروپا کې د یهودیت ضد کړنو لپاره ځای نشته او موږ هوډ لرو چې د هر ډول نفرت سره مبارزه وکړو."
د هالنډ پاچا ویلیم الکساندر دا بریدونه وغندل او ویې ویل، چې هېواد به یې د یهودیت ضد کړونو پر وړاندې بې تفاوته پاتې نه شي.
جو بایډن ویلي دي: "موږ باید د یهودیت ضد کړنو پر وړاندې پرته له وقفې مبارزه وکړو."
د اسراييل د بهرنيو چارو وزارت ويلي، چې د دغه تاوتريخوالي په اړه به پلټنې وکړي. د اسراییل لومړي وزیر بنیامین نتنیاهو د "یهود ضد" ګواښونو په اړه خبرداری ورکړ او ویې ویل: "موږ دا ډول پېښې نه شو منلی."
د هالنډ لومړي وزیر ډیک شوف په بوډاپیسټ کې د اروپايي ټولنې د سرمشریزې په څنډه کې وویل: "هغه پېښه چې په هالنډ کې شوې په اړه یې د شرم احساس لرم. دا یوه ویرونکې شپه وه."
هغه له دې مخکې له بنیامین نتنیاهو سره په ټیلیفوني خبرو کې ویلي و، چې د اسراییل پر وړاندې د «یهودیت ضد» بریدونه په بشپړه توګه د منلو وړ نه دي او برید کوونکي به وپېژندل شي او محاکمه به شي.
