د قطر د بهرنیو چارو وزارت ویلي، چې په غزه کې د اوربند د رامنځته کولو او د یرغمل شویو کسانو د خوشې کولو لپاره د حماس او اسراییل ترمنځ د منځګړیتوب هڅې یې درولي دي. دغه هیواد، همدا راز، په دوحه کې د حماس د دفترونو د تړلو په اړه خپاره شوي رپوټونه رد کړي دي.
قطر د خبرو اترو اړخونو ته خبر ورکړی چې هغه مهال به منځګړیتوب وکړي چې دوی د خبرو لپاره "لازم جدیت" وښيي.
د اوربند په هوکړې کې د پرمختګ د نشتوالي او د یرغمل شویو خوشې کولو په اړه د ناخوښۍ وروسته، قطر پریکړه وکړه چې د منځګړیتوب هڅې وځنډوي.
د قطر د بهرنیو چارو وزارت د شنبې په ماښام وویل، چې په خبرو اترو کې "موږ د هغو ژمنو د پښو لاندې کولو شاهدان وو چې پرې هوکړه شوې وه".
تر دې مخکې رویټرز د امریکا د حکومت د یو جګپوړي چارواکي په حواله راپور ورکړی و، چې وروسته له هغه چې حماس په وروستیو اونیو کې د اوربند او د یرغمل شویو کسانو د خوشې کولو وړاندیزونه رد کړل، امریکا قطر ته وویل، چې په دوحه کې د دغې ډلې د غړیو شتون نور د منلو نه دی او دوی یې باید دفترونه وتړي او له دې هیواد څخه یې وشړي.
د قطر د بهرنیو چارو وزارت ویلي، چې په دغه هیواد کې د حماس د دفترونو د تړل کیدو په اړه خپاره شوي رپوټونه «کره نه دي».
