د طالبانو امربالمعروف وزارت: ښځې باید په ټولنه کې یو له بل سره تعامل وکړي
د طالبانو د امربالمعروف وزارت ویاند وايي، چې ښځې باید په ټولنه کې له یو بل سره تعامل وکړي او دا چې په خپل منځ کې په خبرو کې پر هغوی بندیز نشته.
د طالبانو د امربالمعروف وزارت ویاند وايي، چې ښځې باید په ټولنه کې له یو بل سره تعامل وکړي او دا چې په خپل منځ کې په خبرو کې پر هغوی بندیز نشته.
خیبر، د شنبې په ورځ (د لړم ۱۹ مه) نېته فرانس پريس خبري اژانس ته ويلي: «یوه ښځه له بلې ښځې سره خبرې کولی شي، ښځې باید په ټولنه کې یو له بل سره تعامل وکړي او دوی خپلې خاصي اړتیاوې لري.»
په دې وروستیو اونیو کې ځینو رسنیو د طالبانو د امربالمعروف وزیر محمد خالد حنفي ته منسوب یو ږغیز پیغام خپور کړی، چې هغه ښځې له یو بل سره له خبرو منع کړي دي.
دغه ږغ، چې د اېکس پر خواله رسنۍ خپور شوی، په کې ویل شوي: « ښځې نشي کولی په لوړ غږ تلاوت وکړي او سندرې ووايي. کله، چې بالغه ښځه لمونځ کوي، بله بالغه خور د هغې مخې ته تیریږي، هغې ته اجازه نشته، چې سبحان الله او الحمدلله ووایي. کله چې د تکبیر ویلو اجازه نه وي، نو څنګه سندرې ویلای شي؟.»
خو د محمد خالد حنفي ویاند د فرانسې خبري اژانس ته وویل، چې د ښاغلي حنفي دا څرګندونې د «استثنايي قضیو» سره تړاو لري او هغه دا خبرې د ځانګړو شرایطو لکه د عبادت د وخت او د ښځو د لمانځه په اړه کړې دي.
د خیبر په وینا خالد حنفي له ښځو غوښتي، چې د لمانځه پر مهال په لوړ غږ خبرې ونه کړي او له نورو ښځو سره د خبرو لپاره د لاس له اشارو څخه کار واخلي.
طالبانو په ۲۰۲۱ کال کې واک ته له ستنېدو را وروسته د هرې ورځې په تیریدو سره، د ښځو پر کار، ژوند او زده کړو محدودیتونه زیات کړي دي.
ډیری سازمانونو او د بشري حقونو فعالانو طالبان له ټولنې څخه د ښځو د ګوښه کولو له امله دوی په «جنسيتي توپیر» تورن کړي او په افغانستان کې یې د جنسیتي توپیر په رسمیت پیژندلو غوښتنه کړې.
د طالبانو د ښځو ضد تګلارې له مخې له شپږم ټولګي څخه پورته ښځې او نجونې له زده کړو منع دي او په ورته وخت کې په نادولتي موسسو او ګڼو دولتي ادارو او ټولنيزو ډګرونو کې د کار کولو له حقه هم بې برخې دي.
ښځو ته له محرم پرته د کوره له وتلو او پارکونو ته د تللو اجازه هم نه ورکول کیږي.
