د پاکستان پوځ په خیبر پښتونخوا او بلوچستان کې د ۱۲ جنګیالیو د وژل کېدو خبر ورکړ

د پاکستان پوځ اعلان وکړ، چې په خیبر پښتونخوا او بلوچستان کې یې د دوو جلا جلا عملیاتو په ترڅ کې د یوه بلوڅ قومندان په ګډون ۱۲ جنګیالي وژلي دي.

د پاکستان پوځ اعلان وکړ، چې په خیبر پښتونخوا او بلوچستان کې یې د دوو جلا جلا عملیاتو په ترڅ کې د یوه بلوڅ قومندان په ګډون ۱۲ جنګیالي وژلي دي.
د راپورونو له مخې، په یادو دوو ایالتونو کې تاوتریخوالي د پام وړ زیاتې شوې دي.
د پاکستان د پوځ ویاند وایي، چې دغه دوه عملیاتونه د نومبر په ۱۲مه او ۱۳مه له کره اطلاعاتو وروسته شوي دي.د پاکستان پوځ د چهارشنبې په ورځ د یوې بیانیې په ترڅ کې وویل، چې امنیتي ځواکونو د شمالي وزیرستان په میرانشاه کې د یو لړ عملیاتو په پایله کې اته جنګیالي وژلي او شپږ نور ټپيان کړي دي.د بیانیې له مخې، په بل عملیات کې چې د بلوچستان په کیچ سیمه کې شوې بیا څلور جنګیالي وژل شوي دي.د راپورونو له مخې، په وژل شویو کسانو کې هغه مهم قومندان هم شامل و چې له ډېر وخت راهیسې د پاکستان د امنیتي ځواکونو تر تعقیب لاندې و.


پېښور پولیس وايي، چې د دغه ښار په متنو سیمه کې د خان زاده په نوم یو کس چې ناڅرګندو کسانو دوه ورځې وړاندې تښتولی و، نن یې مړی موندل شوی چې لومړی په ډزو ویشتل شوی بیا سر ترې غوڅ شوی. ټانګ کې یو کس بیا په ډزو وژل شوی.
پېښور کې پولیسو نن چهارشنبه د (لړم ۲۳مه) رسنیو ته ويلي، چې د دغه ښار په متنو سیمه کې د خان زاده په نوم یو کس چې ناڅرګندو کسانو دوه ورځې وړاندې تښتولی و، نن یې مړی موندل شوی چې لومړی په ډزو ویشتل شوی بیا سر ترې غوڅ شوی.
د کورنۍ غړو یې پولیسو ته ویلي، چې هیچا سره شخصي دښمني نه لري.
په یوه بل خبر کې د خیبرپښتونخوا ټانګ ولسوالۍ په مرغې کالوني سیمه کې وسله والو د ایف سي ملیشو یو عسکر په ډزو وژلی.
تر اوسه پورې د دغو دواړو پېښو مسوولیت چا نه دی منلی.
دغه دواړه پېښې داسې مهال شوې چې د همدې پښتونخوا ډېره اسماعیل خان په کلاچۍ سیمه کې وسله والو د پولیسو یو مامور تښتولی او نا معلوم لوري ته یې وړی.
پولیس وايي، په دې اړه یې پلټنې روانې دي، او که یې سیمه معلومه شوه عملیات به پرې وکړي.
په دې وروستیو کې د خیبرپښتونخوا په بیلابیلو سیمو کې وژنې، تښتونې او جګړې تر پخوا ډیرې شوې، چې ډیره مرګ ژوبله په کې ولسي خلکو ته اوړي.

د پاکستان په ګلګیت کې د واده د مراسمو د بس د اوښتو په پېښه کې د زوم په ګډون ۲۶ تنه مړه شوي دي. په دغه بس کې ټول ۲۷ کسان سپاره وو.
دغه بس چې چکوال ته یې د یوه واده مېلمانه لېږدول، د تالیچي پله څخه اوښتی او سیند ته لوېدلی دی.
په دغې پېښه کې د زوم مور هم مړه شوې؛ خو یوازې ناوې په کې ژوندۍ پاتې ده.
ټپي شوې ناوې روغتون ته لېږدول شوې ده.
د پاکستان ولسمشر اصف علي زرداري په ګلګېت کې د دغې پېښې د مرګ ژوبلې په اړه خواشیني څرګنده کړې ده.
نوموړي د سې شنبې په ورځ په یوې خپره شوې خبرپاڼه کې له غمجنو کورنیو سره خواخوږي څرګنده کړې او غوښتنه یې کړې، چې دغو خلکو ته مرستې ورسول شي.
له بلې خوا د پاکستان د کورنیو چارو وزیر محسن نقوي او د پنجاب سر وزیرې مریم نواز هم په دې غمجنه پېښه خواشیني څرګنده کړې او د قربانیانو له کورنیو سره یې خواخوږي ښودلې ده.

د روغتیا نړۍوال سازمان د سې شنبه په ورځ وویل، چې په تېرو یوولسو میاشتو کې په افغانستان او پاکستان کې د پولیو ۷۱پېښې ثبت شوې دي. د دغه سازمان د معلوماتو له مخې، په افغانستان کې د پولیو ۲۳ او په پاکستان کې ۴۸ پېښې ثبت شوې دي.
تېره اوونۍ د پاکستان په خیبر پښتونخوا، بلوچستان او سند ایالتونو کې د ګوزڼ ناروغۍ درې نوې پېښې ثبت شوې دي.
دا راپور په داسې حال کې خپرېږي، چې د طالبانو د روغتیا وزارت ویاند په دې وروستیو کې ویلي و، چې په ۲۰۲۴ کال کې په افغانستان کې د پولیو کومه مثبته پېښه نه ده ثبت شوې.
په افغانستان کې د پوليو واکسين کمپاين هم د طالبانو له خوا له شاوخوا يوې نيمې مياشتې ځنډ وروسته د لړم په اوومه پيل شو، چې په ترڅ کې يې له پنځو کلونو کم عمره سلګونه زره ماشومان واکسين شول.
د روغتیا نړۍوال سازمان په افغانستان او پاکستان کې د پولیو د پېښو په اړه هره میاشت شمېرې وړاندې کوي.
د دغه سازمان د شمېرو له مخې، تېر کال د ګوزڼ ناروغۍ شپږ پېښې په افغانستان او شپږ نورې په پاکستان کې ثبت شوې وې.

د پاکستان لومړي وزیر د طبیعي یخچالونو د ویلې کېدو د مخنیوي لپاره د سملاسي نړیوال ګام اخیستو او همغږو هڅو غوښتنه وکړه.
شهباز شریف نن په باکو کې د اقلیمي بدلون نړیواله غونډه کې زیاته کړه چې پاکستان د دې ارزښتتاکو طبیعي زېرمو د خوندیتوب لپاره له نړیوالې ټولنې سره خپلې همکارۍ ته تیار دی.
د پاکستان دولتي رادیو د خبر له مخې، ښاغلي شریف دا غونډه د کنګلونو د ویلي کېدو د مخنیوي لپاره بې جوړې چانس وباله.
نوموړي طبیعي کنګلونه د انسان د پایښت او د اوبو امنیت او اقلیم خوندیتوب لپاره مهم وبلل.
شهباز شریف وايي، طبیعي یخجالونه د نړۍ ۷۰ سلنه خوږې اوبه برابروي او مهم ایکو سیستم خوندي کوي.
د اقلیمي بدلون په هکله غونډه نن د اذربایجان پلازمېنه باکو کې پیل شوه، چې د مالي مرستو ټولولو غونډه هم بلل کېږي.
په غونډه کې پر پاکه انرژي، له وچکالۍ سره مقابله کې کرنه او له بې وزله هېوادونو سره د بډایه هغو پر مرستو خبرې کېږي.

د خیبر پښتونخوا د ترهګرۍ ضد اداره (سيټيډي) وایي، د یو لړ استخباراتي راپورونو له مخې یې هغه پولیس افسر نیولی چې د ترهګرو ډلو لپاره یې د ترهګریزو بریدونو په ترسره کولو کې اسانتیاوې برابرولې.
د دغې ادارې لهخوا په خپره شوې خبرپاڼه کې چې د تورن کس عکس هم ورسره خپور شوی راغلي، محمد ولي چې په عمر مشهور دی په هغه ځانمرګي برید کې هم ښکېل و د رینګ روډ په جمیل چوک کې د پولیسو پر جومات شوی و او ګڼه مرګ ژوبله یې اړولې وه.
خبرپاڼه کې راغلي، نوموړي د پېښور د پولیسو په لیکو کې دنده لرله او د نیولو پر مهال له هغه څخه د ځانمرګو بریدونو دوه واسکټونه هم نیول شوي دي.
په اعلامیه دا دعوه هم شوې، چې دغه پولیس کارکوونکي په افغانستان کې له ترهګرو ډلو سره اړيکي لرل او له هغه ځایه به ورته د ځانمرګو بریدونو واسکټونه او نور چاودېدونکي توکي رسېدل.
خبرپاڼه دا رنګه وایي، دغه نیول شوي پولیس د جماعت الاحرار ډلې مهم غړی و او د ترهګریزو بریدونو په ترسره کولو کې یې لوی لاس لاره.
پر نوموړي د هغه برید تور هم پورې شوی، چې د ۲۰۲۳ کال د جنورۍ په میاشت کې د پېښور د پولیس لاینز پر جومات شوي و، چې له امله یې ۸۶ تنه پولیس وژل شوي او ۲۴۹ تنه نور په کې ټپیان شوي وو.
هغه مهال هم پاکستاني چارواکو ویلي و، چې په برید کې په افغانستان کې د واکمنو طالبانو لاس دی او ترهګرو ته په پناه ورکولو سره یې په پاکستان کې امنیت ګواښلی دی؛ خو دا او دې ورته تورونه تل د طالبانو لهخوا رد شوي دي.