د خراسان ډایري په نوم پاکستانۍ رسنۍ د امنیتي سرچینو په حواله راپور ورکړی، چې نن سهار د بلوچستان د زیارت په منګي سیمه کې د یو میجر په ګډون دوه پوځیان وژل شوي. د پاکستان امنیتي ادارو لا په دې اړه معلومات نه دي ورکړي.
د خراسان ډایري په نوم پاکستانۍ رسنۍ نن پنجشنبه د (لړم۲۴مه) په خپله ایکس پاڼه د خپلو سرچینو په حواله لیکلي، چې نن سهار د بلوچستان زیارت ولسوالۍ په منګي سیمه کې د یو میجر په ګډون لږ تر لږه دوه پوځیان وژل شوي.
ويل کیږي دغو پوځیانو په یاده سیمه کې ګزمه کوله چې پوځي موټر یې د سړک غاړې په یو ماين ور برابر شو او چاودنه وشوه.
د دغې پېښې مسوولیت بلوڅ بیلتون پالو په غاړه اخیستی او زیاته کړې یې ده چې د برید هدف د پاکستاني پوځ هغه موټر و چې له دغې سیمې تېرېده او د منګي ډیم ته پر لاره و.
په خیبرپښتونخوا او بلوچستان کې د وروستیو نا امنیو او جګړو په دوام تېره ورځ د پاکستان پوځ ویلي و، چې د بلوچستان او وزیرستان په دوو جلا بریدونو کې یې ۱۲ وسله وال وژلي.
