د پاکستان د بهرنیو چارو وزارت وايي، د افغان چارو لپاره د روسیې ځانګړي استازي او د دې وزارت چارواکو په خپلمنځي لیدنه کې د سوله ییز او ښېراز افغانستان لپاره د سیمه ییزو هېوادونو د خپلمنځي همغږۍ د زیاتېدو غوښتنه وکړه.
ضمیر کابلوف پرون اسلام اباد ته تللی و او هلته یې د بهرنیو چارو وزارت وزارت مرستیالې امنه بلوڅ او د افغانستان او لوېدیځې اسیا لپاره د پاکستان له استازي احمد نسیم واړیچ سره جلال جلا ولیدل.
د پاکستان بهرنیو چارو وزارت د اعلامیې له مخې، دواړو لورو پر افغانستان خبرې وکړې او د دې هېواد د سولې او ښېرازۍ لپاره یې د سیمه ییزو هېوادونو د همغږۍ ډېرېدو غوښتنه وکړه.
پاکستاني او روسي چارواکي په دې هم سلا شوي چې په دې برخه کې به خپلې هڅې جاري ساتي.
پاکستان او روسیه په هغو محدودو هېوادونو کې دي چې افغان سفارتونه یې طالبانو ته سپارلي دي.
له دې سره مسکو له افغانستان منځنۍ اسیا ته د وسلوالو د ور اوښتو وېره لري او پاکستان بیا بیا د طالبانو حکومت تورنوي چې د اسلام اباد ضد وسلوالو ته یې په افغان خاوره کې پنا ور کړې ده.
طالبان د پاکستان ادعا ردوي او زیاتوي چې د افغانستان خاوره به د کوم هېواد پرضد ونه کارېږي.
