په پاکستان کې اسلامي نظرياتي شورا د وي پي اين استعمال «غير اسلامي او غير قانوني» بللی او له حکومت یې د بندولو غوښتنه کړې ده. له څو اونیو راهیسې پاکستان کې ځینې رسنوالو ویل، چې د پاکستان حکومت غواړي وي پي اېن بند کړي.
وي پي اين د هغو ويبپاڼو او شبکو د پرانیستلو لپاره استعماليږي، چې د پاکستان ادارو ورته په دغه هېواد کې ورته لاس رسی محدود دی.
د پاکستان اسلامي نظرياتي شورا د جمعې په ورځ په يوه اعلاميه کې ويلي، د وي پي اين استعمال د «شریعت خلاف» کړنه ده.
دوی په خپله اعلامیه کې د دغه هېواد د کورنيو چارو او مخابراتو له ادارې د هغه د بندېدو غوښتنه کړې ده.
خو په خواله رسنیو کې د اسلامي نظریاتي شورا پر دې پرېکړه پراخې نیوکې شوې دي او دا اعلامیه یې د پاکستان د ادارو په خوښه بللې ده.
د پاکستان کورنيو چارو وزارت د اسلامي نظرياتي شورا تر اعلاميې وروسته مخابراتو وزارت ته امر کړی، چې په ټول هېواد کې د وي پي اين استعمالول بند کړي.
پاکستان کورنیو چارو وزارت ويلي، چې «ترهګر» د وي پي اين له استعمال ګټه اخلي
د پاکستان د اسلامي نظرياتي شورا مشر ډاکټر راغب حسين نعيمي په يوې اعلاميه کې ويلي: « حکومت واک لري، چې د اسلامي اصولو له مخې غيري اخلاقي او زيان رسوونکو مواد ته د لاس رسي مخه ونيسي.»
د دغې مذهبي دلې مشر نعيمي د وي پي اين بندول د «شریعت د اصولو» سره سمه کړنه ياده کړې ده.
په پاکستان کې پر ډېرو ټولنيزو شبکو لکه اېکس، يوټيوب، ټيک ټاک او یو شمېر نورو خبري او معلوماتي ويب پاڼې بنديز او لاس رسی ورته محدود دی.
خو ډېری کسان يې د وي پي اين په کارولو سره استعمالوي.
ډېری منتقدين د پاکستان پر دغه بنديز نيوکه کوي او دا د بیان پر ازادۍ يو محدودیت یادوي.
که څه هم په پاکستان کې د اېکس پر ټولینزي پاڼې محدودیت دی؛ خو د دغه هېواد لومړۍ وزير شهباز شريف هم د یو پي اين په استعمال سره په اېکس پاڼه کې فعاليت کوي.
