د طالبانو د بهرنیو چارو وزارت سیاسي مرستیال عباس ستانکزي امریکا او ناټو له افغانستان سره مرستې او تعامل ته وهڅول. ستانکزی وايي، «د نړيوالو اصولو، ډيپلوماسۍ او دوحې د هوکړې له مخې دا د هغوی مسووليت دی، چې افغانستان سره مرستې او تعامل ته را ودانګي څو د دوی وېجاړۍ بېرته جوړې شي».
د طالبانو تر واک لاندې باختر دولتي اژانس د خبر له مخې، د طالبانو د بهرنیو چارو وزارت سیاسي مرستیال عباس ستانکزي دا څرګندونې نن «د لړم۲۷مه» په کابل کې د تخنیکي او مسلکي زده کړو ادارې له لوري د افغانستان د غوره نوښتونو د دویم ملي نندارتون پرانېستغونډه کې وکړې.
ستانکزي زیاته کړې: «هغوی چې شل کاله د بمباريو او چاپو له کبله افغانستان وران کړ، د نړيوالو اصولو، ډيپلوماسۍ او دوحې د هوکړې له مخې دا د هغوی مسووليت دی، چې له افغانستان سره مرستې او تعامل ته را ودانګي، څو د دوی له لوري رامنځته شوې وېجاړۍ بېرته جوړې شي».
د ستانکزي اشاره په نامستقیم ډول متحده ایالتونو او ناټو ته ده.
عباس ستانکزی په داسې حال کې دا څرګندونې کوي، چې تر دې دمه د طالبانو حکومت هېڅ یو هېواد په رسمیت نه پېژني.
عباس ستانکزي د وینا په یو بله برخه کې وویل، چې «افغانانو د اشغال پر وړاندې د مسلحانه جهاد بريا خپله کړې او اوس يو بل ستر مسووليت ور په غاړه دی، چې بايد د علم او پوهې په مرسته افغانستان په خپلو پښو ودروي او د نورو له احتیاج څخه يې خلاص کړي.»
طالبانو په بیا واکمنېدو سره ګام پر ګام د نجونو پر عصري زدکړو بندیز لګولی خو مدرسې یې ورځ تر بلې زیاتوي.
دغه طالب چارواکي د ځینو نورو طالب چارواکو برعکس چې نومهالې زدکړې مباح ګڼي، په ځلونو د افغان نجونو د زدکړو په ملاتړ ټينګار کړی.
د طالبانو د ریاست الوزرا اقتصادي معاونیت نن یکشنبه «د لړم۲۷مه» پر خواله رسنۍ اېکس لیکلي چې د کمپلو جوړولو فابریکې فعالیت به د مالدارۍ او کرنې سکټور د پیاړوتیا ترڅنګ د کاري فرصتونو په زیاتولو کې هم مرسته وکړي.
ملا عبدالغني برادر وايي، دوی هڅه کوي چې د پانګونې کچې په زیاتېدو سره پر بهرنیو وارداتو تکیه راکمه او په کور دننه هېوادوالو ته د کار زمینه برابره کړي.
برادر زیاتوي چې د کورنیو صنایعو د ملاتړ په موخه دې فابریکې ته د افغانستان د کرنې پرمختیا صندوق له لوري د مرابحې اسلامي تمویل قرارداد له مخې د سل میلیونو افغانیو په ارزښت مهم ماشینونه اخستل شوي څو د پانګونې د لګښتونو فشار ورباندې کم شي.
دغه طالب چارواکي پر ټولو سوداګرو او پانګوالو غږ وکړ چې د خپل هېواد د ابادۍ او اقتصادي ودې د پياوړتیا په موخه دلته پانګونه وکړي، حاکمه اداره به اسانتیاوې ورته برابرې کړې او بشپړ ملاتړ یې کوي.
ملا برادر د کمپلو جوړولو فابرېکې مسوولانو ته سپارښتنه وکړه چې د منل شویو معیارونو په پام کې نیولو سره هېوادوالو ته باکیفیته تولیدات وړاندې کړي.
د یادونې وړ ده چې د بخت په نوم د کمپلو جوړولو پر دې فابریکه شاوخوا ۹۳۰ میلیونه افغانۍ پانګونه شوې، چې په ورځني ډول د زر او په راتلونکي کې د پنځه زره کمپلو د تولید ظرفیت لري او اوسمهال یې شاوخوا ۹۰۰ کسانو ته د کار زمینه برابره کړې.
