د طالبانو ستره محکمه وايي، په تخار ولایت کې یې دوه کسانو ته د «لواطت او غلا» په تور په عام محضر کې تعزیرې سزا ورکړې ده. په نړۍوالو فشارونو سربېره طالبانو په افغانستان کې بدني سزاګانې ډیرې کړې دي.
د طالبانو سترې محکمې نن یکشنبه د (لړم ۲۷مه) د یوې خبرپاڼې په خپرولو سره ویلي، چې د تخار ولایت د درقد ولسوالۍ ابتداییه محکمې نن دوه کسان د«لواطت او غلا» په تور د خلکو د سترګو په وړاندې په دورو ووهل.
خبرپاڼه زیاتوې، چې تورن کسان یې د دغې دلې تر واک لاندې د سترې محکمې تر تایید وروسته هر یو ۳۹ـ ۳۹ دورې وهلی دی.
طالبانو د تورونو کسانو د پيژندګلوی په اړه څه نه دي ویلي، خو یادو کسانو ته یې د متهم اصطلاح کارولې ده.
طالبانو درې ورځې وړاندې هم په ننګرهار ولایت کې د یوې ښځې په ګډون ۱۱ کسان د «زنا، لواطت او نامشروع اړیکو» په تور په عام محضر کې په دورو ووهل.
همدارنګه طالبانو د لړم میاشتې په ۲۳مه نېټه په پکتیا کې هغه ته د «قصاص» سزا ورکړه چې د یوه طالب په وژلو تورن و.
د طالبانو له لوري په عام محضر کې خلکو ته د بدنې سزاګانو او «قصاص» ته سخت غبرګونونه ښودل کیږي.
خو دغه ډله نږدې هره ورځ د افغانسان په بېلابېلو ولایتونو کې په عام محضر کې خلکو ته بندنې سزاګاني ورکوي او وايي، دا کار د «اسلامي شریعت» د پلې کولو په موخه تر سره کوي.
