طالبان: تېره ورځ له ایران او پاکستانه ۳۸ کورنۍ خپل هیواد ته راستنې شوې
د طالبانو تر واک لاندې باختر اژانس د راپور له مخې، تېره ورځ له ایران او پاکسانه ۳۸ کورنۍ افغانستان ته راستنې شوې دي.
د طالبانو تر واک لاندې باختر اژانس د راپور له مخې، تېره ورځ له ایران او پاکسانه ۳۸ کورنۍ افغانستان ته راستنې شوې دي.
له ایران او پاکستان څخه د افغان کډوالو د راستنېدو په دوام باختر اژانس د یکشنبې په ورځ د (لړم ۲۷مه) په اېکس پاڼې لیکلي، چې تېره ورځ ۱۴ کورنۍ د ننګرهار ولایت د تورخم له لارې، ۱۰ کورنۍ د کندهار د سپین بولدک له لارې له پاکسانه، ۱۱ کورنۍ د هرات د اسلام کلا له لارې او درې کورنۍ د نیمروز ولایت د ورېښمو پله له لارې له ایرانه راستنې شوې دي.
دغه اژنس د طالبانو د کډوالو وزارت له قوله لیکلي، چې تېره ورځ ۸۳ راستنو شویو کورنیو ته سیمکارتونه وېشل شوي، ۴۳ کورنۍ خپلو اصلي سیمو ته لیږدول شوي او پر سلګونو نورو کورنیو مرستې وېشل شوي دي.
که څه هم طالبانو دا نه دې ویلي، چې دغه افغان کډوال له دوو ګاونډیو هېوادونو څخه په خپله خوښه او که په زور راستنې شوې، خو د تېر یوه کال راهیسې پاکستان او ایران بې اسناده افغان کډوال په زور له خپل هېوادونو څخه افغانستان ته استوي.
له بل پلوه د افغانستان انټرنشنل - پښتو د څېړنو له مخې، په تېر یو کال کې نږدې ۷۴۰ زره افغان کډوال له پاکستانه او ۶۲۱ زره کډوال له ایران څخه بېرته افغانستان ستانه شوي دي.
خو د کډوالۍ نړۍوال سازمان وایي، چې په تېرو درېیو میاشتو کې ۷۸۶ زره ۷۶۹ افغانانو خپل هېواد پرېښی دی.
ورته مهال پاکستاني رسنیو راپور ورکړی و، چې د روان ۲۰۲۴ کال د (اکتوبر له اومې نېټې د نومبر تر پنځمې) له پاکستانه ۲۶ زره او ۴۵۰ افغان کډوال اېستل شوي دي.
د لړم په ۲۲مه بیا ایراني رسنیو ویلي و، چې د روان کال له پيله تر دې دمه ٢٣زره او ١٥٦ تنه بې اسناده افغان کډوال د دوغارون له لارې خپل هېواد ته ستانه کړل شوي دي.
