د افغانستان لپاره د چین ځانګړي استازي یاو شیاوینګ اعلان وکړ چې بیجینګ په دریو کلونو کې د طالبانو تر واک لاندې افغانستان سره څه باندې ۶۴ میلیونه ډالره مرسته کړې ده. د سیګار د راپور له مخې، امریکا هم په دې موده کې افغانستان ته له درې میلیارده ډېر ډالر استولي دي.
د افغانستان لپاره د چین ځانګړي استازي د بېجینګ له بین المللي خبرو اترو مرکز سره په مرکه کې وویل چې هېواد یې په تېرو دریو کلونو کې له افغانستان سره ۴۷۰ میلیونه یوان چې څه باندې ۶۴ میلیونه ډالره کېږي، مرسته کړې ده.
که څه هم چین د طالبانو حکومت په رسمیت نه پېژني، خو په کابل کې یې سفیر ټاکلی او لومړنی هېواد دی چې د طالبانو سفیر یې په بیجینګ کې منلی دی.
له افغانستان نه د امریکايي ځواکونو له وتلو او واک ته د طالبانو له راتګ وروسته چین هم هڅه کړې چې د افغانستان په اقتصادي پروژو او د کانونو، تیلو او ګازو په قراردادونو کې دخیل شي.
له افغانستان سره چې دمګړۍ د طالبانو په واک کې دی، د چین او امریکا د مرستو اندازه له کابل سره د دواړو هېوادونو د چلند ښودنه کوي.
په تېرو دریو کلونو کې د طالبانو تر واک لاندې افغانستان سره د امریکا مرستې د چین په پرتله ۴۷ چنده زیاتې دي.
متحده ایالات طالبان په رسمیت نه پیژني، خو له افغانستان څخه یې له وتلو وروسته کابل ته د مرستو لیږلو ته دوام ورکړی دی.
د سیګار د راپور له مخې، چې په اکتوبر میاشت کې خپور شو، متحده ایالاتو په تیرو دریو کلونو کې له افغانستان او افغان کډوالو سره په ټولیزه توګه ۲۱.۶ میلیارده ډالره مرسته کړې ده.
د سیګار په وینا، له دې پیسو څخه ۳.۳۳ میلیارده ډالر د بشري او پراختیايي مرستو تر نامه لاندې افغانستان ته استول شوې دي.
د طالبانو تر واک لاندې افغانستان سره د امریکا مرستې تل له نیوکو سره مخ دي.
د طالبانو ځینې منتقدان او د امریکا ځانګړی مفتش وايي، چې ښيي افغانستان ته لېږل شویو پیسو ته طالبانو لاسرسی درلود او ګټه یې ترې پورته کړه ده، خو ملګري ملتونه چې د مرستو همغږي کوي، ادعا کوي چې دا پیسې طالبانو ته نه ځي.
د افغانستان بانک چې طالبان یې اداره کوي، تر تېر کال غويي میاشتې پورې په اونۍ کې دوه ځلې کابل ته د ۴۰ میلیونو ډالرو کڅوړو راتلل اعلانول.
طالبانو وروسته د مرستو د رسیدو خبر خپرول بند کړل، خو په په همدغه ترڅ کې سرچینو افغانستان انټرنشنل ته وویل چې کابل ته د ۴۰ میلیونو ډالرو کڅوړې لا هم روانې دي.
