د پاکستان د حکومت له خوا خپره شوې خبرپاڼه کې لیکل شوي، چې له سبا څخه به په اسلام اباد کې ټول تعلیمي مرکزونه وتړل شي. د پاکستان تحریک انصاف ګوند غړي وايي، تر هغه به په اسلام اباد کې خپل لاریون ته ادامه ورکوي څو ددغه ګوند مشر عمران خان له زندان څخه خوشی شي.
د پاکستان حکومت نن یکشنبه «د لیندۍ۴مه» د یوې خبرپاڼې په خپرولو سره وویل چې سر له سبا (د نومبر ۲۵مې) په ټول اسلام اباد کې د تعلیمي مرکزونو د تړلو پرېکړه شوې ده.
د خبر پاڼې یوه کاپي افغانستان انټرنشنل هم ترلاسه کړې ده.
په خبرپاڼه کې لیکل شوي چې دا پرېکړه د روانو حالاتو پر بنسټ شوې ده.
د تحریک انصاف ګوند وايي، چې د پاکستان له بېلابېلو سیمو یې لوی کاروانونه د اسلام اباد پر لور د لاریون په موخه روان شوي.
خو د اسلام اباد د پولیسو مشر وايي، چې په پلازمېنه کې به د ګډوډیو جوړوونکي نیسي او قانوني چلند به ورسره وکړي.
د دغه لاریون لپاره نن یکشنبه د نومبر ۲۴مه ورځ ټاکل شوې وه، خو ښار ته غځېدلې ټولې لارې په کانټینرونو بندې کړای شوې دي.
د پاکستان د تحریک انصاف ګوند له لوري پر ټولنیزو رسنیو د لویو موټریزو کاروانونو انځورونه او ویډیوګانې خپریږي، چې د پاکستان له بېلابېلو سیمو څخه د اسلام اباد پر لور روان دي.
