پاکستاني طالبانو د شمالي وزیرستان منظرخېلو کې امنیتي پوستې سوځولې دي
د شمالي وزیرستان د دته خېل تحصیل په منظرخېل سیمه کې پاکستاني طالبانو پرون هغه امنیتي پوستې وسوځولې، چې تازه د پاکستان امنیتي ځواکونه ترې وتلي دي.
د شمالي وزیرستان د دته خېل تحصیل په منظرخېل سیمه کې پاکستاني طالبانو پرون هغه امنیتي پوستې وسوځولې، چې تازه د پاکستان امنیتي ځواکونه ترې وتلي دي.
یوې سرچینې افغانستان انټرنشنل ته وویل چې دغه پوستې پرون د حافظ ګل بهادر ډلې جنګیالیو سوځولې دي.
سرچینه وايي، چې یادې ډلې دغه پوستې ځکه سوځولې دي، چې پوځ او امنیتي ځواکونه یې بیا ونه کارولای شي.
سرچینې د پوستو د شمېر په اړه څه ونه ویل خو په انځور کې یوازې له یوې پوستې لوګي پورته کیږي.
د منظرخېل غرنۍ سیمه کې دغه پوستې له دې امله مهمې وې چې په درو او شاوخوا سیمو کې ترې په اسانه د جنګیالیو د تګ او راتګ څار کېده.
د پاکستان پوځ او امنیتي ادارو تراوسه ددې پوستو د سوځولو په اړه څه نه دي ویلي.
تحریک طالبان پاکستان د یوې اعلامیې په ترڅ کې ویلي چې د پاکستان استخباراتي ادارې د خپلې ماتې پټولو لپاره غواړي په کورمه کې ځايي اوسېدونکي په خپلو کې سره وجنګوي. ټي ټي پي د پاکستان پوځ ته په اشارې سره وايي، چې ډېر ژر به یې له دې خاورې وباسي او پاکستان به د سولې ټاټوبی وګرځوي.
تحریک طالبان پاکستان نن دوشنبه «د لیندۍ۵مه» په یوه اعلامیه کې د کورمې پر روان کړکېچ خواشيني څرګنده کړې ده.
یادې ډلې د شیعه وو له خوا د سني مسلمانانو د ښځو نیول او وژل غندلي او دا یې د اسلامي او پښتني دودونو خلاف کار بللی دی.
دغه ډله چې د کورمې له جګړې نه یې د تېر اپوټه فاصله اخستې، وايي، « دا د پاکستان د پټو ادارو کار دی او د خپلې ماتې پټولو لپاره یې د خلکو او طبقو د جنګولو تاکتیک خپل کړی دی».
ټي ټي پي په خپله اعلامیه کې زیاته کړې چې دوی د پاکستانیانو د سر او مال دفاع لپاره جګړه کوي او خپلې موخې ته تر رسېدو پورې به جګړې ته ادامه ورکوي.
دې ډلې یوځل بیا خپله جګړه « دفاعي جهاد» ګڼلی دی.
فرانس پرېس خبري اژانس په خیبر پښتونخوا کې د یوه ځايي چارواکي په حواله راپور ورکړی چې د کورمې په درې ورځنیو شخړو کې لږ تر لږه ۸۲ کسان وژل شوي او ۱۵۶ نور ټپیان دي.
د دغه سیمه ییز چارواکي په وینا، په وژل شویو کې ۱۶ سني او ۶۶ یې شیعه وو.
د پښتونخوا ملي عوامي ګوند مشر محمود خان اڅکزی وايي چې پښتانه قتل عام کېږي او د ترهګرو په نوم بدنامیږي. اڅکزي پر خواله رسنۍ اېکس لیکلي چې د پښتنو په یو شمېر سیمو کې ترهګري روانه ده او په کورمه کې د فرقه پالنې په نوم د اور او وینې لوبه روانه ده.
د پښتونخوا ملي عوامي ګوند مشر محمود خان اڅکزي نن دوشنبه «د لیندۍ ۵مه» پر خواله رسنۍ اېکس په کورمه کې د روانو مذهبي جګړو او په اسلام اباد کې د تحریک انصاف ګوند لاریون پر وړاندې د خنډونو په اړه غبرګون ښودلی.
محمود خان اڅکزی وايي، له سیاسي پلوه د ځواکمنو او خپلواکو ولسونو لپاره د دوی طبیعي زیرمې د ابادۍ او هوساینې سرچینه ده، خو د پښتنو ولسونو لپاره د دوی خپلې طبیعي سرچینې یو عذاب ګرځېدلی دی.
اڅکزی وايي، په تېرو پنځو لسیزو کې د نړۍ قدرتونو او د هغوی سیمه ییزو نیابتي ډلو افغانستان د خپلو نړیوالو سیاسي، ستراتیژیکو او اقتصادي ګټو لپاره د جګړې ډګر ګرځولی.
نوموړی زیاتوي، چې «دا د افغانستان د بربادۍ مسوول وحشیان نه دي، بلکې له بده مرغه د نړۍ د متمدنو ولسونو دولتونه او د هغوی اشرافیان دي.»
اڅکزي په یوه بل یادښت کې د تحریک انصاف د لاریون د مخنیوي لپاره د اسلام اباد د ځمکنیو لارو د تړلو پرېکړه په کلکه غندلې ده. هغه وايي، «دا ډول کړنې د ډېموکراتیکو اصولو خلاف دي.»
د تحریک انصاف ګوند غړو تر دې وړاندې ویلي و، چې د نومبر په ۲۴مه به په اسلام اباد کې د عمران خان د خوشې کېدو په موخه اعتراضي لاریون کوي او تر هغه به بیرته نه ګرځي چې حکومت عمران خان نه وي خوشې کړی.
دا مهال د پاکستان په ډیرو سیمو کې اسلام اباد ته غځېدلې لارې او بازارونه تړلي او په دغه ښار کې بیړنی حالت اعلان شوی.
د پاکستان په ملي شورا کې د خیبر پښتونخوا د کورمې ولسوالۍ استازي انجنیر حمید حسین په یوه لاریون کې وویل چې په دې ولسوالۍ کې روانې شخړې د شیعه او سني ترمنځ نه دي، بلکې په دې شخړو کې د پاکستان امنیتي ادارې ښکیلې دي.
حمید حسین وايي چې د پنجشنبې پر ورځ پر یوه موټریز کاروان د برید پرمهال ۳۱ شیعه وګړو ته د سیمې سنيانو په خپلو کورونو کې ځای ور کړی و او د برید له پای ته رسېدو وروسته یې روغ رمټ علیزیو ته ورسول. حمید حسین وویل: « ماته له هر کور نه زنګ وهل کېده، چې له موږ سره پنځه تنه دي، بل ویل زما کور کې لس تنه دي، فکر مه کوئ روغ او خوندي دي، ویل یې موږ ویرېږو چې بهر امنیتي ځواکونه دا هم ونه وژني».
حمید حسین چې یوې اعتراضیه غونډې ته یې خبرې کولې وویل چې ده د پېښور قول اردو له قوماندان او نورو جګپوو چارواکو سره خبرې کړې او د موټریز کاروان په بڼه یې د شیعه وګړو د لېږد مخالفت کړی و، خو له دې سره سره حکومت هغوی د کاروان په بڼه ولېږل چې دغه پېښه رامنځته شوه.
هغه دا «حکومتي ترهګري» وبلله او ویې ویل چې خلک هرڅه ویني او یوازې ننداره نه کوي.
نوموړی وايي، چې امنیتي پوستو ته خپله امنیتي ځواکونو اور اچولی او عامو خلکو ته د اور وژنې اجازه هم نه ور کول کېده.
حسین غوښتنه وکړه چې پوځ دې سرحدونو ته لاړ شي او په کورمه کې دې د سرحدي ځواکونو پرځای پخوانۍ د کورمې ملیشه ځای پرځای شي.
د پاکستان پوځ او امنیتي ادارو د نوموړي د څرګندونو په اړه لا تراوسه څه نه دي ویلي.
د ایران اسلامي جمهوریت مذهبي مشر علي خامنه يي د “بسیجیانو” یوې ډلې ته په خپله وینا کې پر غزه او لبنان د اسراییل بریدونو ته په اشاره وویل، چې د نتنیاهو د نیولو حکم صادرول بسنه نه کوي، باید د هغه د اعدام حکم صادر شي.
علي خامنه يي د دوشنبې په ورځ د بسیجیانو یوې لویې ډلې ته د وینا پر مهال وویل، چې د اسراییل له لوري په غزه او لبنان کې د خلکو پر کورونو بمباري کومه بریا نه ده.
نوموړي زیاته کړه، چې د اسراییل د لومړي وزیر بنیامین نتنیاهو د نیولو حکم صادرول کفایت نه کوي، باید د هغه د اعدام حکم صادر شي.
نوموړي وویل:« د دغو جنایتکارانو د اعدام حکم باید صادر شي.»
خامنه يي دا څرګندونې داسې مهال کوي چې د جرمونو نړیوالې محکمې په دې وروستیو کې د جنګي جرمونو په تور د اسراییل د لومړي وزیر بنیامین نتنیاهو د نیولو امر صادر کړی.
خامنه یي د فلسطین او لنبان ځوانانو ته په خطاب کې وویل، چې که په مبارزه کې اوسي هم په خطر کې دي او که له مبارزې لاس واخلي هم په خطر کې دي.
نوموړي په خپلو خبرو کې وویل، چې د فلسطین او لبنان د ځوانانو لپاره له مبارزې او جګړې پرته بله لاره نشته.
د عمران خان مېرمن بشرا بي بي د پاکستان تحریک انصاف ګوند پلویانو ته په وینا کې وویل، چې لاریونونه به تر هغه وخته روان وي، چې عمران خان له زندانه نه وي راخوشې شوی. هغې په لاریونونو کې د ګډون لپاره له خلکو د ملاتړ غوښتنه هم وکړه.
د پاکستان د پخواني لومړي وزیر عمران خان د ګوند غړي او پلویان په سختو امنیتي تدابیرو سربېره د اسلام اباد «ډي چوک» ته د رسېدو په هڅه کې دي.
اسلام اباد ته د پاکستان له بېلابېلو سیمو څخه د زرګونو لاریونیو د کاروانونو د مخنیوي په موخه ټولې لارې او سړکونه د پولیسو له لوري تړل شوي دي.
د دغو لاریونیو سره د عمران خان مېرمن بشرا بي بي هم ملتیا کوي.
بشرا بي بي اسلام اباد ته نږدي پر موټروې د هزاره انټرچینج په سیمه کې د تحریک انصاف ګوند پلویانو ته په وینا کې وویل، چې «تر څو چې عمران خان له موږ سره نه وي یو ځای شوی، تر هغو به لاریونونه روان ولري.»
نوموړې زیاته کړه: «زما بچیانو او زما وروڼو، تر څو چې خان له موږ سره نه وي یو ځای شوی، موږ به تر هغو پورې دغه لاریونونه نه ختموو، زه خپله تر وروستیو سګلیو په لاریون کې دریږم.»
د ښاغلي خان مېرمن وايي، زما د خاوند لپاره نه بلکي د هېواد د مشر لپاره دې د نوموړي ملاتړ وکړي.
بشرا بي بي وویل: «تاسو زما ملاتړ وکړئ، که څوک ملاتړ هم نه کوي بیا هم زه مبارزه کوم. دا یوازي زما د خاوند مسله نه ده، بلکې د دغه هېواد د رهبر مسله ده. او زه دا باور لرم چې پښتانه غیرتي قوم دی او تر اخیره موږ یوازې نه پریږدي.»
بل خوا نن سهار د اسلام اباد اړوند د ټېسکلا د پولیسو په مرکز کې د د عمران خان، د نوموړي د مېرمنې بشرا بي بي، د هغې د خور علیمه خان او د خیبر پښتونخوا د مشر وزیر علي امین ګنډاپور او د ګوند پر یو شمیر نورو غړو د ترهګرۍ ضد قصیې ثبتې شوې دي.
له زندان څخه د عمران خان د راخوشې کېدو په موخه د تحریک انصاف ګوند پلویانو د تېرې ورځې راهیسې لاریونونه پیل کړي دي.
حکومت اسلام اباد ته د لاریونوالو د ننوتلو د مخنیوي په موخه ټولې لارې او سړکونه بند کړي او په اسلام اباد او شاوخوا سیمو کې یې د عمران خان لسګونه پلویان نیولي او بندیان کړي دي.
