خامنه یي: د نتنیاهو د نیولو حکم بسنه نه کوي باید د اعدام حکم یې صادر شي

د پاکستان د پخواني لومړي وزیر عمران خان د ګوند غړي او پلویان په سختو امنیتي تدابیرو سربېره د اسلام اباد «ډي چوک» ته د رسېدو په هڅه کې دي.

اسلام اباد ته د پاکستان له بېلابېلو سیمو څخه د زرګونو لاریونیو د کاروانونو د مخنیوي په موخه ټولې لارې او سړکونه د پولیسو له لوري تړل شوي دي.

د دغو لاریونیو سره د عمران خان مېرمن بشرا بي بي هم ملتیا کوي.

بشرا بي بي اسلام اباد ته نږدي پر موټروې د هزاره انټرچینج په سیمه کې د تحریک انصاف ګوند پلویانو ته په وینا کې وویل، چې «تر څو چې عمران خان له موږ سره نه وي یو ځای شوی، تر هغو به لاریونونه روان ولري.»

نوموړې زیاته کړه: «زما بچیانو او زما وروڼو، تر څو چې خان له موږ سره نه وي یو ځای شوی، موږ به تر هغو پورې دغه لاریونونه نه ختموو، زه خپله تر وروستیو سګلیو په لاریون کې دریږم.»

د ښاغلي خان مېرمن وايي، زما د خاوند لپاره نه بلکي د هېواد د مشر لپاره دې د نوموړي ملاتړ وکړي.

بشرا بي بي وویل: «تاسو زما ملاتړ وکړئ، که څوک ملاتړ هم نه کوي بیا هم زه مبارزه کوم. دا یوازي زما د خاوند مسله نه ده، بلکې د دغه هېواد د رهبر مسله ده. او زه دا باور لرم چې پښتانه غیرتي قوم دی او تر اخیره موږ یوازې نه پریږدي.»

بل خوا نن سهار د اسلام اباد اړوند د ټېسکلا د پولیسو په مرکز کې د د عمران خان، د نوموړي د مېرمنې بشرا بي بي، د هغې د خور علیمه خان او د خیبر پښتونخوا د مشر وزیر علي امین ګنډاپور او د ګوند پر یو شمیر نورو غړو د ترهګرۍ ضد قصیې ثبتې شوې دي.

له زندان څخه د عمران خان د راخوشې کېدو په موخه د تحریک انصاف ګوند پلویانو د تېرې ورځې راهیسې لاریونونه پیل کړي دي.

حکومت اسلام اباد ته د لاریونوالو د ننوتلو د مخنیوي په موخه ټولې لارې او سړکونه بند کړي او په اسلام اباد او شاوخوا سیمو کې یې د عمران خان لسګونه پلویان نیولي او بندیان کړي دي.

د پاکستان تحریک انصاف ګوند لکونه غړي او پلویان د دغه هیواد له بیلابیلو سیمو څخه تیره ورځ یکشنبه د اسلام اباد په لور د اعتراضي لاریون کولو په موخه خوځېدلي او نن دوشنبه د اسلام اباد څنډو ته رسیدلي دي.

د پاکستان د دفاع وزير خواجه اصف اسلام اباد کې له رسنیو سره په کې ويلي، چې د ټوپک په زور له هيچا سره خبرې اترې نه کوي.

هغه وايي، له دې وروسته د عمران خان له ګوند سره هیڅ ډول خبرې اترې نه کوي.

خواجه اصف وویل چې د اسلام اباد په لور د کاروانونو په راتګ کې کومه ستونزه نه لري. او وايي چې، علي امين ګنډاپور مخکې هم راغلى و او اوس بیا اسلام اباد ته پر لاره دی.

ښاغلي اصف په کورمه کې د وروستیو ناکراریو له امله د خیبرپښتونخوا سر وزیر علي امین ګنډاپور ته په اشارې وويل «څوک چې د صوبې خلکو ته انصاف نه شي ورکولی هغه به مذاکرات څنګه وکړای شي؟ د قانون او نظم رامنځته کول د صوبايي حکومت دنده ده.»

خواجه اصف وویل چې د علي امین ګنډاپور په څیر خلک هیڅ د اعتبار وړ نه دي.

د تحریک انصاف ګوند غړو تر دې وړاندې ویلي وو، چې د نومبر په ۲۴م به په اسلام اباد کې د عمران خان د خوشې کېدو په موخه اعتراضي لاریون کوي او تر هغه به بیرته نه ګرځي چې حکومت عمران خان نه وي خوشې کړی.

دا مهال د پاکستان په ډیرو سیمو کې اسلام اباد ته غځېدلې لارې او بازارونه تړلي دي او په اسلام اباد کې بیړنی حالت اعلان شوی دی.

د پاکستان د بلوچستان ایالت په مرکز کوټه ښار کې لس ورځې مخکې یو لس کلن ماشوم ښوونځي ته پر لاره د نامعلومو کسانو له لوري وتښتول شو.

د یاد ماشوم له تښتولو وروسته په کوټه ښار کې د سیاسي ګوندونو، عامو خلکو په ګډون د ښوونځیو زده کوونکو پرلت وواهه.

پرلت د کوټې په ښار کې د محکمې، د والي د کور او قومي اسامبلۍ مخې ته وهل شوی دی.

خو د لسو ورځو په تېریدو سره لا هم ځايي امنیتي چارواکي د لس کلن زده کوونکي په پیدا کېدو کې پاتې راغلي.

نن دوشنبه د (لیندۍ پنځمه) د پرلت والو په غوښتنه په بلوچستان ایالت کې کاربندیز اعلان شوی او ورسره سم ټول ښوونځي هم له نن ورځې لپاره رخصت کړل شوي دي.

د تښتول شوي ماشوم پلار محمد رضا کاکړ وايي، د لسو ورځو په تېریدو سره لا هم د ځايي امنیتي چارواکو له لوري د نوموړي د زوی د پیدا کېدو په اړه کوم مثبت ګام نه دی پورته شوی.

پرلت کوونکي د مصور په پیدا کولو کې حکومت او ځايي امنیتي چارواکي په ناغیړۍ تورنوي او وايي، که دغه ماشوم د تښتونکو له منګولو راخوشې نه شي په بلوچستان ایالت کې به پراخ لاریونونه او د لارو بندول پیل کړي.

بل خوا، د سیمه ییزو سرچینو د راپورونو له مخې، د غزې د روغتون یو مدیر د یو اسراییلي ډرون په برید کې ټپي شوی دی.

د شنبې په شپه د اسراییلي پوځ د ویاند له خوا د شیجیا ښارګوټي د اوسیدونکو لپاره د کورونو د پریښودو امر وشو. دغه امر چې پر اېکس خواله رسنۍ خپور شوی و، لامل یې له دغې سیمې د فلسطیني جنګیالیو له خوا د راکټي بریدونو ترسره کیدل ښودل شوي.

د پوځ په اعلامیه کې راغلي: "د خپل خوندیتوب لپاره، تاسو باید سمدستي د سویل لوري ته ګډه شئ."

تر دې وړاندې، د حماس د وسله والې څانګې له خوا د شنبې په ورځ پر اسراییل د راکټي برید خبر ورکړل شوی و او ویلي یې و، چې د پولې په اوږدو کې یې د اسراییلي پوځ یوه اډه په نښه کړې ده.

په ټولنیزو شبکو او فلسطیني رسنیو کې خپاره شوي انځورونه ښیې چې اوسیدونکي په خرګاډو او ریکشو کې د شیجیا څخه د وتلو په حال کې دي.

د سیمې اوسیدونکو او فلسطیني رسنیو ویلي، چې په ټاکل شوو سیمو کې میشتو کورنیو د شنبې په شپه او د یکشنبې په سهار وختي له خپلو کورونو څخه په وتلو پیل کړی. تر دې وړاندې هم د غزې د بیلابیلو سیمو خلک په وار وار په بې ځایه شوي دي.

په همدې حال کې، د غزې په مرکزي سیمو کې روغتیايي چارواکو ویلي، چې د شنبې له شپې راهیسې د المغازي او البریج په ښاري کمپونو باندې د اسراییلو په هوايي بریدونو کې لږ تر لږه ۱۰ فلسطینیان وژل شوي دي.

د غزې د ۲.۳ میلیونه خلک د اسراییلو د روانو پوځي عملیاتو له امله په پرلپسې توګه بې ځایه شوي دي. په همدې حال کې د ژمي د سختو بارانونو له امله، د بې ځایه شوو خلکو خیمې له اوبو ډکې شوي او د هغوی خواړه یې خراب کړي دي.

د رامي په نوم د غزې یو ۳۵ کلن اوسیدونکی د ژوند د سختو حالاتو په اړه رویټرز ته ویلي: "په نیمه شپه کې مې وروسته له هغه منډه کړه، چې د باران اوبه خیمې ته راننوتې، خواړه یې راته یووړل، ماشومانو چیغې کړې،‌ ځکه د اوبو له امله وډار شول او ما دا ویره لرله چې دوی به ناروغه شي."

د فلسطین د ملکي بیړنیو خدماتو ادارې ویلي، چې زرګونه بې ځایه شوي خلک د موسمي سیلابونو له امله اغیزمن شوي او له مرستندویه موسسو څخه یې د ژغورنې لپاره د نویو خیمو او خوراکي توکو غوښتنه کړې.

د پاکستان حکومت نن یکشنبه «د لیندۍ۴مه» د یوې خبرپاڼې په خپرولو سره وویل چې سر له سبا (د نومبر ۲۵مې) په ټول اسلام اباد کې د تعلیمي مرکزونو د تړلو پرېکړه شوې ده.

د خبر پاڼې یوه کاپي افغانستان انټرنشنل هم ترلاسه کړې ده.

په خبرپاڼه کې لیکل شوي چې دا پرېکړه د روانو حالاتو پر بنسټ شوې ده.

د تحریک انصاف ګوند وايي، چې د پاکستان له بېلابېلو سیمو یې لوی کاروانونه د اسلام اباد پر لور د لاریون په موخه روان شوي.

خو د اسلام اباد د پولیسو مشر وايي، چې په پلازمېنه کې به د ګډوډیو جوړوونکي نیسي او قانوني چلند به ورسره وکړي.

د دغه لاریون لپاره نن یکشنبه د نومبر ۲۴مه ورځ ټاکل شوې وه، خو ښار ته غځېدلې ټولې لارې په کانټینرونو بندې کړای شوې دي.

د پاکستان د تحریک انصاف ګوند له لوري پر ټولنیزو رسنیو د لویو موټریزو کاروانونو انځورونه او ویډیوګانې خپریږي، چې د پاکستان له بېلابېلو سیمو څخه د اسلام اباد پر لور روان دي.