د یوګانډا رسینو د پنجشنبې په ورخ (لېندۍ ۸مه) راپور ورکړی، چې هکرانو د دغه هیواد د مرکزي بانک سیسټم هک کړی او له دې سره یې ۱۶.۸ میلیونه ډالر چې شاوخوا ۶۲ میلیارده یوګانډايي شیلینګ کیږي، غلا کړي دي.
دغه هکران، چې د ویسټ ځان معرفي کوي، د یوګانډا بانک معلوماتي سیسټمونو ته یې لاسرسی موندلی او د دې میاشتې په پیل کې یې په ناقانونه توګه پیسې انتقال کړي دي.
د یوګانډا دولتي ورځپاڼې په یو راپور کې د نامعلومو سرچینو په حواله ویلي، چې په سویل ختیځې اسیا کې میشتې دغې د هکرانو ډلې د غلا شویو پیسو یوه برخه جاپان ته استولې، خو بانک توانیدلی چې د غلا شویو پیسو نیمایي برخه بیرته راوګرځوي.
د دغه سایبري برید په ځواب کې ولسمشر یوري موسویني د څیړنو امر کړی.
د یوګانډا مرکزي بانک او پولیسو په دې اړه د رویټرز پوښتنو ته ځواب نه دی ورکړی.
په یوګانډا کې د مخابراتي شرکتونو په ګډون بانکونه او نور د مالي خدمات وړاندې کونکي په مکرر ډول د سایبري بریدونو لاندې راغلي، خو چارواکي وايي، چې ځینې بانکونه په عامه توګه د داسې پیښو په تاییدولو کې زړه نازړه دي.
د یوګانډا تر ټولو لوې خپلواکې ورځپانې ډیلي مانیټر راپور ورکړی، چې ممکن غلا کې د بانک داخلي کسان هم ښکیل وي.
د انلاین مانیټر د راپور له مخې: «امنیتي ادارې له دې سره د داخلي دندې په توګه چلند کوي، دا د یوګانډا بانک، د مالیې وزارت د خزانې ریاست او د عمومي محاسبې دفتر ترمنځ د همکارۍ پایله وه.»
