د پښتون ژغورنې غورځنګ مشر په اسلام اباد کې د تحریک انصاف پر غړو د پاکستان د حکومت برید غندلی او وايي، چې دولتي دستګاه د ولس مظلومیت د بري په توګه نمانځي خو دا کړنې به ددوی د ماتې او بد پای لامل شي.
پشتین د پي ټي ای لاریونونو ته د پوښښ ور کوونکي خبريال مطيع الله جان تښتول غندلي او له خبریالانو سره یې خپل پیوستون ښودلی.
منظور پشتین چې له اوږدې مودې وروسته یې پر خپل اېکس پیغام خپور کړی وايي، چې «خلک په ظلم او له واک څخه په ناوړه استفادې سره نه شي غلي کېدای».
نوموړي زیاته کړې « هرڅومره چې دا ظلمونه کوي هغومره به يې د زوال ورځې کمې وي، په دې شرط چې بېلابېلې ولسي کړۍ د دوی پر وړاندې مبارزه کې خپل مورال لوړ وساتي او خپلې مبارزې ته دوام ورکړي».
د عمران خان په غوښتنه راغوښتل شوی لاریون او پرلت په اسلام اباد کې د امنیتي ځواکونو له عملیاتو وروسته له مرګ ژوبلې سره مل پای ته ورسېد. په دغه لاریون کې ګڼ کسان وژل شوی او ټپیان دي، خو حکومت یې د نړیوالو غبرګونونو له ویرې تراوسه کره شمېر نه دی ډاګیز کړی.
