اکانومیک ټایمز په یوه راپور کې لیکلي، چې لس هېوادونه د جګړې، سیاسي بې ثباتۍ او په هغو کې د رامنځته کېدونکو جرمونو له امله چې مساپرو ته جدي ګواښ پېښوي، باید دغو هېوادونو ته سفر ونه کړي. په دغه راپور کې د طالبانو تر واک لاندې افغانستان د نړۍ تر ټولو خطرناک هېواد بلل شوی.
په دغه راپور کې چې د شنبې په ورځ د(لیندۍ ۱۰مه) خپور شوی، په کې راغلي: «افغانستان د نړۍ تر ټولو خطرناک هیواد دی چې له روانو جګړو، سیاسي بې ثباتۍ او له سختو بشري بحرانونو سره لاس او ګریوان دی.»
اکانومیک ټایمز لیکلي: «لسیزې جګړې او د طالبانو بیا راژوندي کېدل د پراخ تاوتریخوالي او ناامنۍ لامل شوی دی.»
د دغه راپور له مخې، بې وزلي، د لومړنیو خدمتونو نشتوالی، د خوراکي توکو نه خوندیتوب او د روغتیايي خدمتونو کمزوری سیستم هغه نور لاملونه دي چې په افغانستان کې یې کړکېچ لا ډېر کړی دی.
د اکانومیک ټایمز د راپور له مخې، په افغانستان کې د داعش په څېر د ترهګرو ډلو شتون تاوتریخوالي ته لمن وهي او د خلکو ورځنی ژوند یې له ګواښ سره مخ کړی.
د اکانومیک ټایمز د راپور له مخې، په افغانستان سربېره یمن، سوریه، سویلي سوډان، کانګو، روسیه، اوکراین، سومالیا، سوډان او عراق هغه هېوادونه دي چې په ۲۰۲۵ کال کې باید سفر ورته ونه شي.
