د افغانستان د ازادۍ جبهه وایي، چې د سې شنبه په ماښام یې په کابل کې د طالبانو د امر بالمعروف او استخباراتو برخې د موټرو کاروان په نښه کړ، چې پایله کې یې د طالبانو ۵ تنه غړي وژلي او دوه تنه نور یې ټپيان کړي دي.
دغه جبهه وایي، دغو طالبانو د کابل په ۱۱مه ناحیه کې د نرسینګ او قابله ګۍ څانګو ښځینه محصلینې د خیرخانې ۱۰۲ بستره شفاخانې په لور د اېستلو په حال کې وو.
د افغانستان د ازادۍ جبهې ویلي، چې دغه عملیات یې د قلعه نجارا څلور لارې ته په غځېدلي سړک ترسره کړی او په وژل شویو کې د امر بالمعروف ادارې د مولوي مبشر په نوم یو مشر هم شامل دی.
دغې جبهې پر اېکس پاڼې یوه ویډیو هم خپره کړې، چې په ویډیو کې لومړی د اور لمبه ښکاري او ورپسې بیا د چاودنې غږ اورېدل کېږي.
طالبانو تر اوسه د دې بریدونو په تړاو څه نه دي ویلي.
افغانستان انټرنشنل - پښتو د یوې بې پرې رسنۍ په توګه نه شي کولی، چې د مقاومت جبهې ادعا تایید یا رد کړي؛ خو په وروستیو کې په افغانستان کې پر طالب وسله والو برېدونو کې زیاتوالی راغلی او د یادو بریدونو مسوولیت د ازادۍ او مقاومت جبهې پر غاړه اخلي.
