سرچینو افغانستان انټرنشنل ته وویل چې د طالبانو استخباراتو په کابل کې ارزو ټلویزیون تړلی دی. طالب استخباراتو د دغه ټلویزیون شپږ تنه کارکوونکي له افغانستان انټرنشنل او امو ټلویزیون سره د همکارۍ په تور نیولي دي.
اروپایي اتحادیې د طالبانو وروستی ګام، چې پر ښځو او نجونو یې طبي زده کړې بندې کړې په سختو ټکو وغنده او دا یې له بشري حقونو جدي سرغړونه او د جنسیتي برابرۍ پر وړاندې یو لوی ګوزار وباله.
اروپایي اتحادیې د چارشنبې په ورځ په خپره شوې اعلامیه کې اندېښنه څرګنده کړه چې دغه پالیسي به د افغانستان بشري ناورین لا پسې ژور کړي او د افغانانو کړاوونه به نور هم زیات کړي.
اعلامیه وايي، "دا پرېکړه یو ځل بیا د بنسټیزو بشري حقونو خلاف یو بوږنوونکی ګام او د ښځو زده کړو پر وړاندې نه توجیه کېدونکی برید دی".
اروپایي اتحادیې د ښځو د زده کړو او کاري ځواک کې د هغوی د ګډون پر ارزښت ټینګار کړی او دا یې د هر ملت د ځانبسیاینې او پرمختګ لپاره مهم بللی.
په اعلامیه کې له طالبانو غوښتنه شوې چې دا تبعیضي پالیسي بېرته واخلي او د نړیوالو قوانینو په اډانه کې ژمنو ته درناوی وکړي، په ځانګړي ډول ټولو افغانانو ته د زده کړو او اساسي روغتیا برابر لاسرسی ډاډمن کړي.
اعلامیه زیاتوي، "اروپایي اتحادیه د افغان ښځو او نجونو او هغو ټولو کسانو ملاتړ ته ژمنه ده چې په دوامداره توګه یې حقونه نقض کېږي".
د طالبانو مشر په یوه تازه ګام کې په افغانستان کې د ښځو پر طبي زده کړو او د روغتیاپالنې پر انسټیټیوټونو بندیز لګولی، چې په کوردننه او بهر یې ګڼ غبرګونونه را پارولي دي.
د روسیې د بیړنیو حالاتو وزارت یوې الوتکې (ایل-۷۶) د چارشنبې په سهار کابل ته۲۸ ټنه بشري مرستې ورسولې. د روسیې د بیړنیو حالاتو وزارت رسنیز دفتر وايي، چې دا د روان کال په اوږدو کې افغانستان ته د مسکو د مرستو پنځمه جوپه ده.
یاد وزارت وايي، « د وزارت ځانګړې الوتکې د افغانستان د خلکو لپاره پنځمه جوپه بشري مرستې ورسولې».
د دې مرستو ډېره برخه خوراکي توکي دي.
تاس خبري اژانس وايي، چې دغه بشري مرستې د روسیې د ولسمشر ولادیمیر پوتین د فرمان او د بیړنیو حالاتو وزیر الکساندر کورینکوف د لارښوونو پر بنسټ ترسره شوې، چې د افغانستان له کړکېچن وضعیت سره د مرستې ژمنتیا څرګندوي.
روسیه په داسې حال کې کابل ته بشري مرستې لیږي، چې د طالبانو تر واک لاندې افغانستان له د دوامدارې اقتصادي بېثباتۍ او نړیوالې انزوا سره مخ دی.
پخواني ولسمشر حامد کرزي په طبي انسټیټوټونو کې د نجونو پر زدهکړو د لګېدلي بندیز په اړه اندېښنه ښودلې او پر طالبانو یې غږ کړی، چې په طبي انسټیټوټونو کې د نجونو پر زدهکړو لګېدلي بندیزونه سملاسي لرې کړي.
ښاغلي کرزي ویلي، افغانستان هغه مهال له بهرنۍ اړمنتیا وتلای شي چې له تعلیم یافته او متخصصو بشري قواوو برخمن شي.
هغه پر اېکس پاڼه لیکلي، دا کار هغه مهال شونی دی چې د ټولو ځوانانو (نجونو او هلکانو) ته د زدهکړو زمینه برابره شي.
هغه لیکلي، پر داسې مهال چې د هېواد په ټولو برخو کې ښځې او مېندې د ګڼو روغتیایي ستونزو سره مخ دي؛ د نجونو پر مخ د روغتیایي علومو د موسسو دراوزو د ټړلو خبره خواشینوونکې ده.
هغه په ټینګار سره ویلي، په بېلابېلو اړخونو کې د اړتیا او احتیاجۍ څخه د خلاصون یوازینۍ لاره او د هېواد د پرمختګ او پراختیا لامل ښوونه او روزنه ده.
هغه پر طالبانو غږ کړی، چې په طبي موسسو کې د نجونو پر زدهکړو لګېدلي بندیزونه سملاسي لرې کړي او ترڅنګ یې د هغوی لپاره دې د ښوونځیو او پوهنتونونو دروازې هم ژر تر ژره خلاصې کړي.
د طالبانو مشر ملا هبت الله اخوندزاده په یوه نوي فرمان کې په طبي انسټیټوټونو کې د نجونو پر زدهکړو بندیز لګولی دی.
د طالبانو د عامې روغتیا وزارت د دوشنبې په ورځ د انسټیټوټونو مشرانو ته ویلي و، چې تر دې وروسته نجونې په دغو مرکزونو کې د زدهکړو اجازه نه لري.
د طالبانو تر واک لاندې سترې محکمې خبر ورکړی، چې په خوست او فاریاب ولایتونو کې یې اوو کسانو ته په عام محضر کې تعزیري سزا ورکړې ده.
د دغې محکمې لهخوا په دوو جلا خپرو شویو خبرپاڼو کې راغلي، چې دغه کسان یې د بېلابېلو جرمونو په تور محاکمه کړي دي.
د دغې محکمې په لومړۍ خبرپاڼه کې راغلي، چې په خوست ولایت کی یې شپږو کسانو ته د «نامشروع اړیکو، دوکو او بډې اخیستلو» په جرم په عام محضر کې تعزیري سزا ورکړې ده.
په خبرپاڼه کې راغلي، چې ابتدائيه محکمې د یادو کسانو له ډلې څلور مجرمين پر یوـ یو کال تنفیذي بند او ۳۵ - ۳۵ دُرو تعزیري سزا، یو مجرم پر دوه کاله تنفیذي بند او ۳۵ دُرو تعزیري سزا او شپږم مجرم پر یوه کال تنفيذي بند او (۳۹) دُرو تعزیري سزا محکوم کړی دی.
د دغې محکمې لهخوا په دویمه خپره شوې خبرپاڼه کې راغلي، چې د فاریاب ولایت په پښتونکوټ ولسوالۍ کې یې هغه کس ته چې په «نامشروع اړیکو» تورن و؛ سزا ورکړې ده.
په خبرپاڼه کې راغلي، چې په دغه ولایت کې ابتدایه محکمې نوموړی د ۳۹ درو ترڅنګ په درې کلن بند هم محکوم کړی دی.
په پنجشېر ولایت کې د طالبانو د کانونو او پټرولیم ریاست مسوولین وایي، چې واک ته د طالبانو له بیا راستنېدو وروسته تر دا مهاله ۴۳ زره قیراطه زمرد پلورل شوي دي.
د طالبانو تر واک لاندې باختر اژانس خبر ورکړی، چې دغه زمرد ټولټال د ۲ مېلیونه، ۷۸۸ زره او ۹۴۰ امریکایي ډالرو په ارزښت پلورل شوي دي.
د دغه اژانس په وینا، د دغو پلورل شویو زمردو ۲۷۸ زره ډالره عاید یې دولت ته رسېدلي دي.
دا مهال په پنجشېر ولایت کې له ۴۵۰ کانونو څخه زمرد استخراجېږي.
تر دې وړاندې د طالبانو د کانونو او پټرولیم وزارت ویلي و، په پنجشېر کې د زمردو ۱۷۰۰ کانونه پېژندل شوي چې له دې ډلې ۴۵۰ یې د ملاهبت الله په ځانګړي فرمان د دغه ولایت خلکو ته ورکړل شوي او استخراج یې روان دی.
تر دې وړاندې هم طالبانو ویلي و، چې د روان کال په لومړیو شپږو میاشتو کې یې په ۱۱ پړاونو کې ۳۵ زره او ۸۷۴ قیراطه زمرد د یو مېلیون او ۶۱۴ زره ډالرو په ارزښت پلورلي دي.
تر ډېره بریده پر طالبانو نیوکې کېږي چې، دغه کانونه په نامسلکي توګه راباسي چې تر ډېره د کانونو اصلي زېرمو ته زیان اړوي.
