د سوريې د دولت ضد وسله والو اعلان وکړ چې د حمص ښار یې په بشپړه توګه نیولی دی
د سوریې د حکومت د مخالفو ځواکونو یو قوماندان حسن عبدالغني اعلان وکړ، چې وسله والو یې د سوریې په مرکز کې د حمص ښار بشپړ کنټرول تر لاسه کړی دی.
د سوریې د حکومت د مخالفو ځواکونو یو قوماندان حسن عبدالغني اعلان وکړ، چې وسله والو یې د سوریې په مرکز کې د حمص ښار بشپړ کنټرول تر لاسه کړی دی.
د سوریې حکومتي ځواکونو له یوې ورځې څخه تر لږې جګړې وروسته د شنبې په ورځ د حمص مهم ښار پرېښود.
هغه انځورونه چې په ټولنیزو رسنیو کې خپاره شوي ښيي، چې زرګونه کسان د حمص په مرکز کې د «ساعت میدان» کې جشن نیولی او د بشارالاسد د نسکورېدو غوښتنه کوي.
تر دې مخکې، د حمص ښار مرکزي زندان د بشارالاسد د حکومت ضد وسله والو له لوري ونیول شو.
د سیمې اوسېدونکو رویټرز ته ویلي و، چې د سوریې د حکومت ځواکونه په حمص ښار کې د شاتګ په حال کې دي.
سي اېن اېن د شنبې په ورځ د سرچینو په حواله راپور ورکړ، چې د سوریې ولسمشر بشارالاسد په دمشق کې حضور نه لري. سرچینو ویلي دي، چې د سوریې ولسمشر په هغو ځایونو کې چې مخکې اوسېده او یا لیدل کېده، نه دی لیدل شوی.
د سوریې د جمهوري ریاست دفتر له دمشق څخه د بشارالاسد وتل رد کړي دي.
ایراني چارواکو هم د بشار الاسد د تېښتې په اړه راپورونه رد کړي دي.
اخوا سي اېن اېن بیا د خپلو سرچینو په حواله ویلي، چې اسد په دمشق کې نه دی تر سترګو شوی.
باخبرو سرچینو سي اېن اېن ته ویلي، چې د سوریې ولسمشر د ښار په هغو ځایونو کې چې معمولا لیدل کېده، نه لیدل کېږي.
سرچینې زیاتوي، چې د جمهوري ریاست ساتونکي چې پخوا به په منظمه توګه د ولسمشر په استوګنځي کې ځای پر ځای ول اوس نه دي.
پرون داسې راپورونه خپاره شول چې د اسد کورنۍ روسیې ته تللې ده.
له دمشق څخه د بشارالاسد د وتلو اوازې په داسې حال کې دي، چې وسله وال د پرمختګ په حال کې دي.
د بشارالاسد د حکومت پر ضد وسله والو اعلان کړی، چې د دمشق شاوخوا سیمو ته نږدې شوي دي.
لا معلومه نه ده، چې اسد چېرته پناه اخیستې ده.
د امریکایي چارواکو د وړاندوینې له مخې، د بشار الاسد حکومت به تر څو ساعتونو او یا هم څو ورځو کې سقوط وکړي.
په ورته وخت کې ایراني چارواکو هغه راپورونه رد کړي، چې دمشق کې یې د سفارت کارکوونکي ورځیني فعالیتونه بند کړي.
د ایران د بهرنیو چارو وزارت ویانداسماعیل بقایي ټینګار وکړ: «دا ادعاوې حقیقت نه لری. په دمشق کې د ایران سفارت خپلو ورځینیو فعالیتونو ته دوام ورکوي.»
د امریکا ولسمشر جوبایډن د دغه هېواد د استازو د مجلس مشر او د سنا د مجلس سرپرست ته په یو لیک کې ویلي، چې د روسیې د تېري د مخنیوي په خاطر په اروپا کې تر ۸۰زرو ډېر امریکایي سرتېري ځای پر ځای شوي دي.
سپینې ماڼۍ د جمعې په ورځ دا لیک خپور کړ، چې په کې د جګړې لپاره د متحده ایالاتو د وسله والو ځواکونو د ځای پرځای کولو په اړه تفصیل ورکړل شوی.
په دې لیک کې بایډن لیکلي: "زه د پوځ د سرقوماندان او اجراییوي رییس په توګه د خپل قانوني واک پر بنسټ په ټولو عملیاتو کې د امریکايي وسله والو ځواکونو د ګډون لارښوونه کوم."
د شپیګل اونیزې د لړم میاشتې په پای کې د محرمو اسنادو په حواله راپور ورکړ، چې جرمني د دغه هېواد په ختیځو سیمو کې د سلګونو زرو ناټو ځواکونو د ځای پر ځای کولو لپاره پلان او چمتووالی نیولی دی، ځکه که روسیه سره جګړه پیلیږي دوی به هم اقدام وکړي.
په دې راپور کې ویل شوي چې برلین تمه لري چې د جرمني او د ناټو د نورو غړو هېوادونو شاوخوا اته سوه زره سرتېري د جرمني په خاوره کې ځای پرځای شي او د لویدیځ او مسکو ترمنځ د کړکېچ د زیاتیدو په صورت کې د روسیې له ګواښونو سره مقابله وکړي.
تر دې مخکې د اروپايي ټولنې د بهرني سیاست مشر له روسیې سره په جګړه کې د اوکراین بریا د اروپا د امنیت لپاره حیاتي ګڼلې وه.
د پاکستان د ترهګرۍ ضد ادارې اعلان کړی، چې پښتونخوا صوبه سږ کال د خونړیو بریدونو او سخت تاوتریخوالي شاهده ده. د رسمي شمېرو له مخې په پښتونخوا کې په يو کال کې ۶۳۶ ځله بريدونه شوي، چې په ترڅ کې يې ۲۷۵ کسان وژل شوي او ۴۶۰ نور ټپيان دي.
د دغه راپور له مخې، چې د لیندۍ په ١٧مه د شنبې په ورځ خپور شو، په وژل شويو کې ١٤٢ يې د امنيتي ځواکونو او ١٣٣ يې ملکي وګړي دي.
دغه راپور ښيي چې په دغو بریدونو کې ۲۱۴ پولیس او ۲۴۶ ملکي وګړي ټپیان شوي دي.
په دې پېښو کې شپږ ځانمرګي بريدونه، د پښتونخوا په بېلابېلو سيمو کې ١١٣ بمونو چاودنې او ٣٥٥ د ډزو بریدونه شامل دي.
دا بریدونه د پښتونخوا د سختو امنیتي ننګونو ښکارندویي کوي، چې لا هم د سخت دریځو ډلو د جګړې ډګر دی.
د دغې دولتي بنسټ راپور ښيي چې د یوه کال په اوږدو کې د پاکستان د پوځ له خوا عملیات شوي، چې په پایله کې یې ۲۴۶ «ترهګر» وژل شوي دي.
همدارنګه ۷۳۹ کسان د «ترهګریزو» کړنو په تور نیول شوي چې له دې جملې څخه ۲۹ تنه د مهمو هدفونو په توګه پیژندل شوي دي.
نیویارک ټایمز د جمعې په ورځ د ایراني چارواکو په حواله لیکلي، چې فاطمیون او یو شمېر نور په ایران پوري تړلي وسله وال د سوریې پلازمېنې دمشق او لاذقيه ته انتقال شوي دي. د راپورونو له مخې دغه وسلوال له عراق سوریې ته ننوتي چې د بشارالاسد د مخالفو وسله والو پرضد جګړه وکړي.
په دغه رپوټ کې د ایران د چارواکو په حواله ویل شوي دي، چې دغه وسلوال دمشق او لاذقيه ته چې د بشارالاسد د رژیم اډې دي انتقال شوي دي.
د سپاه پاسداران اړوندو انټرنيټي حسابونو کې ځيني ويډيوګانې خپرې شوې، چې پکې د فاطمیون په یونیفورم کې وسلوال دمشق ته نږدې زینب زیارت کې دېره دي.
د وسله والو د ایتلاف ناڅاپي بريد د کورنۍ جګړې حالت په ډراماتيک ډول بدل کړ او یوازې په يوه اونۍ کې يې د حلب او حما په څېر مهم ښارونه ونيول او پراخې سيمې يې تر خپلې ولکې لاندې راوستي
نیویارک ټایمز د ایراني سرچینو له قوله ویلي، د قدس ځواکونو دوه جګپوړي قوماندانان چې په سوریه کې د ایران ځواکونو مشران وو، د جمعې په ورځ د سوريې د ديموکراتیکو ځواکونو له خوا دیرالزور او د حیات التحریر له خوا د حمص له نیولو وروسته عراق ته وتښتېدل.
رویټرز خبري اژانس تېره اوونۍ راپور ورکړ، چې په ایران پورې تړلي وسله وال د بشارالاسد د وسله والو پرضد د جګړې لپاره له عراق سوریې ته ننوتلي دي.
د دغه رپوټ له مخې د حشد الشعبي او د عراق د کتایب حزب الله او فاطمیون ځواکونه په دغو کې لېږل شویو ځواکونو کې دي.
د سوریې د پوځ یوې جګپوړې سرچینې تایید کړې، چې دغه وسله وال د یکشنبې په ورځ (د لېندۍ ۱۱ مه) نېټه د ابو کمال له پولې تېر شول او سوریې ته ننوتل.
د سپاه پاسداران د بهرنۍ څانګې قدس ځواکونو تر څار لاندې فاطمیون یوه وسلواله ډله ده چې اکثره غړي یې په ایران کې میشت افغان کډوال دي او زیات شمیر یې په سوریه کې وژل شوي دي
افغان شیعه عالم ایت الله رحیمي سیغاني بامیاني په ایران کې پر ځینې افغان کډوالو نیوکه کړې چې د سوريې په جګړه کې برخه اخیستو ته لېوال دي.
هغه په دې جګړه کې د کډوالو د ګډون د غوښتنې په جواب کې وویل، چې د سوریې په جګړه کې د افغانانو ګډون «جهاد نه یرغل دی.»
د پارلمان پخواني غړي او طالبانو ته نژدې کس جعفر مهدوي له ایرانه غوښتي، چې د سوریې جګړې ته د افغانانو له لېږلو ډډه وکړي.
هغه وویل دا ویره شته، چې «یو ځل بیا به افغانان ناارادي د افغانستان په خاوره کې د دې جګړې د پايلو دروند قیمت پرې کړي.»
ایران د خپلو سیمه ییزو ګټو د خوندي کولو لپاره د سوریې د حکومت بقا ډېره مهمه ګڼي او په همدې خاطر د ایران ځواکونه په ۲۰۱۷ کال کې په سوریه کې د جګړې ډګر ته داخل شول.
د پاکستان نړیوال هوايي شرکت یا پي ای اې وايي، راتلونکې جنورۍ د فرانسې پلازمېنې پاریس ته په الوت سره اروپا ته خپلې الوتنې بیا پیلوي.
د اروپايي ټولنې د هوايي خوندیتوب ادارې تېره اونۍ له پي ای اې دغې وچې ته پر الوت لګېدلي بندیزونه لرې کړل.
د پاکستان دفاع وزیر لومړنی کس و چې تېره اونۍ یې اروپا ته د دغه شرکت پر الوت د بندیزونو لرې کولو خبره وکړه.
اوس د دې شرکت ویاند عبدالله حفیظ یوه اعلامیه کې ویلي چې اروپايي ټولنې ته د لومړني الوت تایید یې تر لاسه کړی دی.
نوموړی وايي، دا شرکت د ډیسمبر پر نهم مسافرو ته د ټیکټونو اخیستلو چاره پیلوي او لومړنۍ الوتنه به جنورۍ کې وشي.
پاکستان کې د الوتکې غورځېدو پېښه کې د ۹۷ کسانو وژل کېدو او د لسګونو پیلوټانو د جعلي اسنادو د خبر خپرېدو پسې اروپايي ټولنې او بریتانیا د پي ای اې پر الوتنو بندیز ولګاوه.
د دې هوايي شرکت ویاند وايي، دوی به د بریتانیا له ټرانسپورټ ادارې سره هم د الوتنو پر بیا پیلېدو ژر خبرې پیل کړي.
د دې بندیزونو له امله هر کال د پاکستان هوايي کرښې ته تر څلوېښت میلیارد روپیو یا ۱۴۴ میلیون ډالرو تاوان رسېدلی دی.
د اروپايي ټولنې د هوايي خوندیتوب ادارې د ۲۰۲۰ جون پر ۳۰ پر پاکستان نړیوالې هوايي کرښې د بندیز لګېدو سره د هغه وخت د حکومت په هڅو پسې د همغه کال د جولای تر ۳ د لنډمهال لپاره التونو ته اجازه ور کړل شوه، خو بیا تر اوسه پرې بندیز و.
هغه مهال د پاکستان د هوايي چلن وزیر د خپل هېواد پارلمان ته خبرو کې منلې وه، چې تر ۱۵۰ پیلوټان سندونه نه لري.