طالبانو تحریر الشام ډلې ته پر دمشق د تسلط مبارکي وویله
د طالبانو د بهرنیو چارو وزارت د یوې اعلامیې په ترڅ کې د سوریې پر وروستیو بدلونونو خوښي ښودلې او د سوریې ولس او د تحریر الشام ډلې مشرتابه ته یې ددغه بري له امله مبارکي ویلې ده.
د طالبانو د بهرنیو چارو وزارت د یوې اعلامیې په ترڅ کې د سوریې پر وروستیو بدلونونو خوښي ښودلې او د سوریې ولس او د تحریر الشام ډلې مشرتابه ته یې ددغه بري له امله مبارکي ویلې ده.
په دې اعلامیه کې راغلي چې « د افغانستان اسلامي امارت د بهرنیو چارو وزارت په سوریه کې وروستۍ پرمختیاوې چې په ترڅ کې يې د جگړې او بې ثباتۍ عامل له منځه ولاړ او پلازمینه دمشق د هيئت تحرير الشام په مشري د سوريې د ولس لاس ته ولوېده، د یاد حرکت قیادت او ولس ته مبارکي وايي او هيله څرگندوي چې د انقلاب پاتې پړاوونه په داسې ډول مدیریت کړي چې د یوه امن، متحد او باثباته نظام خاوند شي».
طالبانو په دې اعلامیه کې هیله ښودلې چې د واک د لېږد بهير داسې پرمخ ولاړشي چې په پايله کې يې د سوريې ټول ولس پرې راټول شي.
اعلامیه وايي، دوی هیله لري « د یوه داسې اسلامي نظام د بنسټ ډبره کېښودل شي چې له هر ډول توپیر او غچ پرته او د عمومي عفوې تگلارې خپلولو سره د سوریې ټول ولس راټول کړي».
د طالبانو د بهرنیو چارو وزارت وايي، نوي واکمنان باید د نړۍ له هيوادونو سره داسې مثبت سیاست غوره کړي چې سوريه د بهرنيو لوریو د منفي سياليو له گواښه وژغوري.
د طالبانود بهرنيو چارو وزارت په سوریه کې له ټولو ښكېلو بهرنيو لوريو غوښتي، چې په خپل منځ کې او هم له نويو واکمنو سره د مثبت تعامل او همکاريو سياست غوره کړي.
طالبان داسې مهال د سوریې نویو واکمنو ته دا مشورې ور کوي، چې په افغانستان کې له واکمنېدو وروسته دې ډلې په کوردننه پر خلکو، په ځانګړې توګه ښځو ګڼ بندیزونه لګولي، واک یې انحصار کړی او له نړۍ سره یې تراوسه اړیکې نه دي رغېدلې.
د افغانستان انټرنشنل د ځانګړي رپوت له مخې، د طالبانو د استخباراتو زندانونو کې بندیان له پښو راځړول کیږي او په کوچینو پنجرو کې ساتل کیږي. ۱۷ زنداني شویو دا منلې چې د استخباراتو په زندان کې له پښو راځوړند شوي او په لښتو او لرګیو وهل شوي دي.
دوو زنداني شویو ویلي چې له ځوړندېدو وروسته یې په خوله کې اوبه ور اچول شوې او په زوره د څښلو امر پرې شوی او که یې نه څښلې په لښتو یې وهلي دي.
په دې شکنجه کې د ډېرو اوبو څښل د دې لامل کیږي چې اوبه پر پوزې بېرته راووځي او د ډېر شدید درد لامل ګرځي.
د بغلان د پلخمري اوسېدونکی حبیب الله چې د طالب استخباراتو په ۰۹۸ ریاست کې یې د پوښتنو پر مهال پښه ماته شوې، وايي چې په پخواني جمهوري نظام کې یې دنده ترسره کړې وه او د طالبانو د استخباراتو له خوا د خیرخانې په کوتل کې ونیول شو.
نوموړی وايي چې پر ده د طالبانو له نظام څخه د بغاوت تور و او د طالبانو د استخباراتو په ریاست کې د شکنجې پر مهال له پښو ځوړند شوی و او بیا د ډېرو وهلو له امله یې پښه ماته شوې ده.
حبیب الله وايي چې له پښې ماتېدو وروسته د استخباراتو ریاست روغتون ته انتقال شو او په پښه کې یې سیخ ورتېر کړ.
د حبیب الله پلار چې دوکاندار دی، وايي، زوی یې له نږدې یو کال زندان وروسته خوشی شو خو پښه یې لا هم ژوبله ده او نه شي کولی په عادي ډول د ژوند چارې سرته ورسوي.
هغه وايي چې څو ځله یې د طالبانو تر کنټرول لاندې ارګ ته عریضې ورکړې خو چا یې په اړه کوم مثبت ځواب ورنه کړ.
یو زنداني شوي دا منلې چې د پوښتنو پر مهال ۳۲ ساعته په یوه کوچنۍ پنجره کې اچول شوی و، چې څملاستلی او درېدلی پکې نه شوای.
د لغمان ولایت دغه اوسېدونکی وايي چې د ۱۴۰۲ کال په جوزا میاشت کې په لغمان کې د طالب استخباراتو له خوا ونیول شو او له نیول کېدو سره سم د هوښیارو سپینو(K-9) په پنجره کې واچول شو.
نوموړی د لغمان پر دریو ولسوالیو سربېره د کابل د دوو ولسوالیو د جمهوري دورې ولسوال هم پاتې شوی دی.
دغه زنداني شوی وايي چې طالبانو پرې تور پورې کړی و چې دی د طالبانو پر ضد فعالیتونو کې لاس لري. هغه وايي چې له ۱۷ میاشتو زندان وروسته بېرته خوشې شو.
دغه راز ۲۹ زندانیانو دا منلې چې د طالبانو د استخباراتو په زندانونو کې په تیاره خونه کې ساتل شوي او نه یې شول کولی چې یو متر وړاندې څه وویني.
پنځو زنداني شویو ویلي چې په تیاره خونه کې په لوړ غږ نامجهول شور او ځوږ هم پرې اورول کېده چې له ذهني اړخه یې شکنجه کړي وو.
بشپړ رپوټ دلته ولولئ: https://content.afintl.com/pa/afg-torture/index.html
د خوست لپاره د طالبانو ویاند وايي، نن یو شمېر کسانو په خوست کې د سوریې د یاغیانو بری ونمانځه. له خوست څخه خپرو شویو ویډیوګانو کې د طالبانو وسله وال او د دې ډلې تر واک لاندې نظامي موټر ښکاري، چې د خوښۍ ډزې کوي او د طالبانو بیرغونه پکې رپیږي.
د خوست ولایت لپاره د طالبانو والي ویاند مستغفر ګربز نن یکشنبه «د لیندۍ ۱۸مه» پر خپل اېکس لیکلي چې په خوست کې راټول شوي کسان په دمشق کې د خپلو «مومنو رجالو» بریا نمانځي.
ګربز زیاتوي چې په دغو مراسمو کې تکبیرونه زمزمه کېدل او د اسلامي نظام په ویاړ او بریا یې شعارونه بدرګه کول.
طالبانو له دې وړاندې اعلان کړی و، چې پر ځايي وخت له درې نیمو بجو څخه د تحریر شام وسله والو د دمشق د سترې فتحې او بري په مناسبت مراسم نیول شوي دي.
خوست لومړی ولایت دی چې د طالبانو له خوا پکې د سوریې یاغیانو خوښي نمانځل کېږي.
که څه هم په ټولنیزو شبکو کې طالبانو او د دوی پلویانو په ټولنیزو رسنیو کې د سوریې یاغیانو د بري لپاره پراخ تبلیغات کول، خو تر دې دمه دې ډلې په رسمي ډول د سوریې یاغیانو بري په اړه کومه رسمي اعلامیه نه ده خپره کړې.
د یادونې وړ ده، چې د بشر الاسد د حکومت وسله والو مخالفانو نن یکشنبه سهار اعلان وکړ، چې په سوریه کې یې د اسد کورنی رژیم پرځولی دی.
د افغانستان انټرنشنل- پښتو د څیړنیز رپوټ له مخې، طالبان زنداني شوي کسان د اقرار لپاره په یخو اوبو کې دروي. د خوشال په نوم یوه بندي افغانستان انټرنشنل ته وویل چې په لومړۍ شپه د طالبانو له خوا د اوبو په یخ بیلر کې درول شوی و او په زور اقرار ته مجبورېده.
په دې شکنجه کې بندیان په یخو اوبو کې ډوبوي، یا د بدن ځینې برخې یې په یخو اوبو کې ډوبوي، چې د شدیدې یخنۍ او درد لامل ګرځي.
دریو زنداني شویو افغانستان انټرنشنل ته وویل چې په اوبو کې د ډوبېدو پر مهال بې هوښه شوي او کله چې په هوښ راغلي بیا شکنجه شوي دي.
د کابل د خېرخانې اوسېدونکی چې موږ یې په خوشحال مستعار نوم یادوو، وايي، د ۱۴۰۲ لمریز کال د لیندۍ میاشتې په ۷مه نېټه په کابل کې په خپل کور کې د طالب استخباراتو په چاپه کې نیول شوی و.
نوموړی وايي چې د نیول کېدو پر مهال طالب وسله والو په وسلو وواهه او له هغه وروسته نه دی پوی شوی چې کوم ځای ته یې وړی دی.
هغه زیاتوي چې له درېیو شپو او ورځو نامعلوم برخلیک وروسته په دې پوی شو چې د طالبانو د استخباراتو په ریاست کې دی، خو پر دې نه پوهېده چې کوم ریاست کې زنداني دی.
خوشحال وايي چې په څلورمه شپه ترې طالبانو پوښتنې ګروېږنې پیل کړې او پر ده تور و چې له داعش – خراسان ډلې سره همکاري لري.
نوموړی زیاتوي چې په لومړۍ شپه د طالبانو له خوا د اوبو په یخ بیلر کې درول شوی و او په زور اقرار ته مجبورېده.
خوشحال وايي چې طالب استخباراتي پوښتونکو یې څو ځله سر هم په اوبو کې ډوب کړ او د سابندولو هڅه یې کوله.
د خوشحال د تره زوی چې د کابل په یوه خصوصي ښوونځي کې معلم دی افغانستان انټرنشنل – پښتو ته وویل چې نږدې ۲۱ ورځې یې په خوشحال پسې پلټنه وکړه او وروسته معلومه شوه چې د استخباراتو په ۴۹۸ ریاست کې چې په ۰۹۸ ریاست مشهور دی، زنداني دی.
نوموړی وايي چې له ۷۳ ورځو وروسته طالب استخباراتو هغه بېرته خوشې کړ.
په شنو لښتو وهل
د افغانستان انټرنشنل د رپوټ له مخې، د طالبانو د استخباراتو په ریاستونو کې بندیان په لښتو یا لرګیو په دوامدار ډول وهل کیږي، چې بدن یې ورسره ټپي کیږي. په دا ډول شکنجه کې زندانیان په لاسونو، پښو، ملا او کوناټیو وهل کیږي.
په دې شکنجه کې لومړی د ونو شنې لښتې په اوبو کې اچول کیږي او وروسته د یوې ناټاکل شوې اندازې له مخې لسګونه لښتې پوښتنخونې ته وړل کیږي او د پوښتنو او ګروېږنو پر مهال زنداني پرې وهي.
د ننګرهار ولایت د جلال اباد ښار اوسېدونکی چې موږ یې د عطاالله په مستعار نوم یادوو واييچې د روان ۱۳۰۴ ل کال د زمري په ۱۷مه نېټه په جلال اباد ښار کې داسې مهال نیول شوی، چې غوښتل یې له خپل کار ځای څخه کور ته لاړ شي.
نوموړی وايي چې لومړی د طالب استخباراتو له خوا د هغه سر ته یوه توره کڅوړه ور واچول شوه او بیا د استخباراتو ریاست ته یووړل شو.
د عطاالله په وینا،د استخباراتو په ریاست کې په لومړۍ شپه په لښتو او ډانګونو ووهل شو او پر ده تور و، چې له بهرنیو رسنیو سره یې همکاري کړې ده.
نوموړی وروسته له سل ورځني زندان څخه بېرته خوشې شوی خو دا مهال د درملنې لپاره پېښور ته تللی دی.
د عطاالله یو همکار افغانستان انټرنشنل – پښتو ته وویل چې طالب استخباراتو عطاالله تر هغه له ځان سره ساتلی و، چې د بدن ټپونه یې ښه شول او د شکنجې نښې یې ورکې شوې خو د سر ټپونه یې وروسته له خوشې کېدو هم معلومېدل.
د برېښنا شاکونه
د افغانستان انټرنشنل د رپوټ له مخې، بندیانو ته په بدن یا ځانګړو برخو باندې برېښنايي شاکونه ورکول کیږي، چې شدید درد او د بدن غړو د شل کېدو لامل ګرځي.
د زندانیانو په وینا، د برېښنا شاکونه د ولو په منځ، په دواړو ورنونو او د پښو په غټو ګوتو کې ورکول کیږي چې پر شدید درد سربېره ذهني ګنګستیا رامنځته کوي.
د دغو زنداني شویو له ډلې یوې مېرمنې ویلي چې د برېښنا شاکونو پر مهال بې هوښه شوې او بې وخته ښځینه میاشتینۍ ناروغي یې پیل شوې وه.
د پروان یوه اوسېدونکې چې موږ یې د فرشتې په مستعار نوم یادوو، وايي چې د ۱۴۰۲ لمریز کال د لیندۍ په دویمه نېټه د شپې پر مهال د سرحوض په سیمه کې د ازادۍ جبهې له خوا د پخواني ډګروال جیلاني پر کور چې دا مهال پکې یو طالب قوماندان اوسېده، برید وشو.
نوموړې وايي چې له برید وروسته طالبان د دوی سیمې ته ورغلل او ټول کورونه یې تالاشي کړل او په دې جریان کې یې د نوموړې کور هم تالاشي کړ.فرشته چې یوه پخوانۍ څارنواله ده، وايي،طالبانو نوموړې له خپل ۱۳ کلن زوی سره ونیوله او د استخباراتو ریاست ته یې یوړه.
نوموړې وايي چې له شپږو ورځو رواني شکنجې وروسته یې کابل ته ولېږدوله او په لومړۍ شپه په لښتو ووهل شوه، د طالب وسله والو له خوا پرې د وسلو ګوزارونه وشول او په دویمه شپه برېښنايي شاکونه ورکړل شول.
فرشته زیاتوي چې پر دې له ازادۍ جبهې سره د اړیکو تور و او طالبانو ورته ویل چې په خپل کور کې یې د ازادۍ جبهې غړو ته ځای ورکړی و.
نوموړې وايي چې د شپې پر مهال یې د برېښنايي شاکونو یوې ځانګړې خونې ته ولېږدوله او لومړی وګواښل شوه چې که د ازادۍ جبهې د غړو په اړه معلومات ور نه کړي نو برېښنايي شاکونه به ورکړي.
هغه زیاتوي چې له ګواښونو وروسته یې د نوموړې د پښو غټو ګوتو پورې د برېښنايي شاکونو لینونه وتړل او څو پرلپسې شاکونه یې ورکړل.فرشتې وویل چې وروسته بیا پر خپل ځان نه ده پوهه شوې او کله چې له بې هوښۍ راپورته کېده بې وخته میاشتنۍ ناروغي یې هم پیل شوې وه.
د فرشتې په وینا، د زندان پر مهال یې له زوی احوال نه درلود خو کله چې له ۴۱ ورځو زندان وروسته کور ته لاړه خبره شوه چې زوی یې له اوو ورځو زندان وروسته خوشې شوی او په کور کې دی.
د هغې زوی افغانستان انټرنشنل – پښتو ته وویل چې د زندان پر مهال ورته ویل شوي وو چې مور یې د ازادۍ جبهې وسله والو ته جاسوسي کوي او ښايي د جاسوسۍ په تړاو اعدام شي.
فرشته دا مهال په کابل کې د خپل پلار په کور کې اوسي او له خپلې خور سره یو ځای د هغې د پلار د اچارو د جوړولو په کارخونه کې کار کوي.
بشپړ رپوټ دلته ولولئ: https://content.afintl.com/pa/afg-torture/index.html
د پخواني ولسمشر مرستیال امرالله صالح وايي، په سوریه کې د بدلون د ورځې نمانځنه په ۲۰۰۱ کال کې د طالبانو د رژیم د نسکورېدو په مناسبت د خلکو له خوښیو سره ورته ده. صالح وویل، دا جشن به بېرته افغانستان ته راګرځي خو د "طالبانو د ایستلو" بڼه به توپیر ولري.
د مخکیني ولسمشر لومړي مرستیال امرالله صالح د یکشنبې په ورځ «د لیندۍ ۱۸مه» په سوریه کې د بشار الاسد حکومت د نسکوریدو او د دغه هیواد د خلکو د جشن او خوښیو په غبرګون کې وویل: «طالب ملېشې به یو ځل بیا زموږ له خاورې اېستل کېږي.»
دغه پخواني حکومتي چارواکي ومنله چې دا ځل به د «طالبانو د ایستلو» او د دې ډلې د ځای ناستي حکومت بڼه توپیر ولري.
په سوریه کې د بشارالاسد کورنۍ د نیمې پېړۍ واکمنۍ ړنګېدو او د دغه هېواد د ولسمشر د تېښتې په اړه ګنګوسو د سوریې او د افغانستان د پخواني حکومت د نسکورېدو د پرتلنې په اړه بحثونه راپارولي دي.
تر دې مخکې د افغانستان د سولې په چارو کې د امریکا پخواني استازي زلمي خلیلزاد په کنایه سره ویلي و چې که بشار ابوظبۍ ته تښتېدلی وي، دا ښه فرصت دی چې له اشرف غني سره روغبړ وکړي.
بل خوا د حامد کرزي د دفتر مشر کریم خرم هم د سوریې جګړه له افغانستان سره پرتله کړې او لیکلي یې دي چې د سوریې وضعیت د افغانانو لپاره لوی درس دی.
هغه ویلي چې د سوریې درس دا دی چې داخلي کړکېچونه باید بې حله پاتې نه شي.
د طالبانو د کډوالو او بېرته راستنېدونکو چارو وزارت وايي، چې په تېرو اتو میاشتو کې له ۹۰۰ زرو څخه ډېر افغان کډوال بېرته افغاستان ته راستانه شوي دي.
د طالبانو تر واک لاندې ملي راډیو په یوه خپاره شوي راپور کې د دغې ډلې د کډوالو او بېرته راستنېدونکو چارو وزارت د چارواکو په حواله ویلي، چې دغه شاوخوا ۹۰۰ زره افغان کډوال له ایران، پاکستان او ترکیې څخه راستانه شوي دي.
د دغه وزارت ویاند عبدالمطلب حقاني ویلي، چې د دغې شمېرې له ډلې له ترکیې څخه ۱۵زره، د پاکستانه ۸۸ زره او پاتې نور له ایرانه راستانه شوي دي.
نوموړی وایي، دغه کډوال د وري میاشتې له پیل څخه تر لړم میاشتۍ وروستۍ نېټې پورې هېواد ته راستانه شوي دي.
نوموړي د ملي راډیو سره په خبرو کې نورو راستنېدونکو کسانو لپاره په سرحدي او فرضي دروازو کې د مرستو او اسانتیاوو په برابرولو ټینګار کړی دی.
ورته مهال د طالبانو تر واک لاندې باختر اژانس خبر ورکړی، چې تېره ورځ له ایران او پاکستانه ۲۶ کورنۍ بېرته افغانستان ته ستنې شوې دي.
خو له تېرې یوې اوونۍ راهیسې له ایران او پاکستانه د ستنېدونکو کډوالو په شمېر کې کموالی راغلی دی.
په تېرو اونیو کې به له دواړو هېوادونو د ستنېدونکو کورنیو شمېر د ورځې تر ۳۰۰ پورې رسېده؛ خو له تېرو څو ورځو راهیسې دغه شمېره راټیټه شوې ده.
تر دې وړاندې (د لړم په ۱۵مه) د افغانستان انټرنشنل - پښتو یو څېړنو راپور خپور کړی و چې له مخې یې، په تېر یو کال کې نږدې ۷۴۰ زره افغان کډوال له پاکستانه او ۶۲۱ زره کډوال له ایران څخه بېرته افغانستان ستانه شوي دي.
خو د کډوالۍ نړۍوال سازمان ویلي و، چې په تېرو درېیو میاشتو کې ۷۸۶ زره ۷۶۹ افغانانو خپل هېواد پرېښی دی.