د طالبانو ویاند ذبیح الله مجاهد د بشري حقونو د نړۍوالې ورځې په مناسبت وايي، د بشري حقونو د دفاع سازمانونه او هېوادونه دې په افغانستان کې د لویدیځو هېوادونو کلتور د بشري حقونو په نوم د پلي کېدو غوښتنه نه کوي.
د طالبانو تر واک لاندې د افغانستان ملي راډیو د یادې ډلې د ویاند ذبیح الله مجاهد یو غږیز پیغام خپور کړی او نوموړی په کې ادعا کوي، چې په افغانستان کې د یادې ډلې د محکمو او امر بالمعروف وزارت له لوري د ټولو خلکو حقونه تامین دي.
ښاغلی مجاهد د بشري حقونو د نړۍوالې ورځې په مناسبت وايي، د بشري حقونو سازمانونه او هېوادونه دې په افغانستان کې د لویدځیو هېوادونو کلتور د بشري حقونو په نوم د پلي کېدو غوښتنه نه کوي.
نوموړی وايي: «فرهنګونه سره توپیر لري، مختلف فرهنګونه په مختلفو هېوادونو کې، په لویديځ کې او په مرکزي اسیا کې فرهنګونه سره توپیر لري، شاید په افریقا او اروپايي هېوادونو کې بیا بېل فرهنګونه وي؛ خو دا په افغانستان کې د حقونو په نوم پلي کولو او غوښتل چې څنګه په لویدیځ کې دي دا کار اصولي نه دی. ځکه موږ خپل دین لرو، خپل فرهنګ او اساس لرو.»
بل خوا نن سې شنبه په افغانستان کې د ملګرو ملتونو د سر منشي ځانګړې استازي ویلي، چې په افغانستان کې د بشري حقونو خوندیتوب په اوږدمهاله او خطرناک ډول د له منځه تلو په حال کې او تر ډیره یې زیان ښځې او نجونې ګالي.
اغلې روزا اوتنبایوا له طالبانو غوښتي، چې په افغانستان کې د ښځو، نجونو او نارینه و او هلکانو د اوسنیو او راتلونکو نسلونو د خوندیتوب او هوساینې لپاره د بشري حقونو نړۍوال مکلفیت ومني.
