طالبانو په غزني کې یوه ښځه او نارینه د ”زنا“ په تور په دورو وهلي دي
د طالبانو سترې محکمې د یوې خبرپاڼې په خپرولو سره ویلي، چې یوه ښځه او یو نارینه یې چې په “زنا” تورن وو په عام محضر کې په دورو وهلي دي.
د طالبانو سترې محکمې د یوې خبرپاڼې په خپرولو سره ویلي، چې یوه ښځه او یو نارینه یې چې په “زنا” تورن وو په عام محضر کې په دورو وهلي دي.
د طالبانو د سترې محکمې له لوري د سې شنبې په ورځ د (لېندۍ ۲۰مه) په خپره شوې خبرپاڼه کې لیکل شوي، چې دوه ورځې وړاندې یې د غزني ولایت په مقر ولسوالۍ کې یوه ښځه او یو نارینه چې په “زنا” تورن وو په عام محضر کې تعزیري سزا ورکړې ده.
د خبرپاڼې د معلومات له مخې، چې تورن کس یې ۳۹ دورې وهلی او درې کاله د بند سزا او تورنه ښځه یې هم ۳۹ دورې وهلې او د پنځه کاله بند سزا یې ورکړې ده.
د طالبانو د سترې محکمې په خبرپاڼه کې د یادو تورنو کسانو د پېژندګلوي په اړه څه نه دي ویل شوي؛ خو وايي، دوی ته یې د یادې ډلې د سترې محکمې تر تایید وروسته دغه سزا ورکړې ده.
په تېرو اتو ورځو کې طالبانو په کاپیسا او میدان وردګ ولایتونو کې د یوې ښځې په ګډون شپږو کسانو ته په عام محضر کې تعزیري سزاګانې ورکړې دي.
که څه هم پر طالبانو په عام محضر کې د بدني سزا ورکولو په اړه د بشري حقونو د ملاتړو سازمانونو له لوري سختې نیوکې کېږي؛ خو لا هم طالبان لږ تر لږه په یوه یا دوو ورځو کې د افغانستان په بېلابېلو ولایتونو کې پر خلکو په عام محضر کې بدني سزاوې عملي کوي.
د طالبانو دغه کړنې په نړۍواله کچه غندل کېږي؛ خو طالبان وایي دوی «د اسلامي شریعت» د تطبیق په موخه دغه چاره ترسره کوي.
