ایران د دوو افغانانو په ګډون ۱۲ کسان اعدام کړي دي
د ایران د بشري حقونو د سازمانونو خبري اژانسونو هرانا او هنګاو د کرج او قُم په زندانونو کې د دوو افغانانو په ګډون د لږ تر لږه ۱۲ کسانو د اعدام راپور ورکړی دی.
د ایران د بشري حقونو د سازمانونو خبري اژانسونو هرانا او هنګاو د کرج او قُم په زندانونو کې د دوو افغانانو په ګډون د لږ تر لږه ۱۲ کسانو د اعدام راپور ورکړی دی.
دوی ویلي، چې د کرج په قلعه حصار زندان کې د یوه افغان په ګډون ۹ تنه او د قُم په زندان کې د یوه افغان په ګډون درې تنه بندیان اعدام شوي دي.
هرانا راپور ورکړی، چې د چهارشنبې د ورځې په سهار د یوه افغان په ګډون نهه تنه بندیان اعدام شوي او هنګاو هم لیکلي، چې د سې شنبه په ورځ د یوه افغان په ګډون درې تنه اعدام شول.
د هرانا د راپور له مخې، د هغو نهو بندیانو له جملې څخه چې د چهارشنبې په ورځ اعدام شول، پنځه یې د قتل په تور او څلور نور یې د نشه یې توکو د جرمونو په تور په اعدام محکوم شوي وو.
هرانا لیکلي، هغه افغان چې د چهارشنبې په سهار د نهو کسانو په ډله کې اعدام شوی، عبدالله تاجک نومېده.
تر دې مخکې د هنګاو راپور ورکړی و، چې د قُم په مرکزي زندان کې د عبدالمهدي راشد میري په نوم یو افغان زنداني او د سعید مطیع او اصغر رمضاني په نوم دوه نور بندیان اعدام شوي دي. د هنګاو په وينا، دغه بنديان پخوا د قتل او نشه يي توکو په جرمونو په اعدام محکوم شوي وو.
