ژوند او روغتیا؛ بې خوبي مو د روغتیا قاتله ده
خوب مو څنګه دی؟ هره شپه څو ساعته خوب کوی؟ ایا خوب مو منظم دی که نه؟ که چېرې منظم خوب نه لرئ او تل بې خوبه یاست نو دغه لیکنه راسره ولولئ.
خوب مو څنګه دی؟ هره شپه څو ساعته خوب کوی؟ ایا خوب مو منظم دی که نه؟ که چېرې منظم خوب نه لرئ او تل بې خوبه یاست نو دغه لیکنه راسره ولولئ.
که د انسان بدن اوبو او خوړو ته ډېره اړتیا لري، همداسې خوب ته هم ډېره اړتیا لري. بدن د ورځې په اوږدو کې له ذهني او بدني فشارونو وروسته د بیا رغونې لپاره خوب ته اړتیا لري. خو کله چې خوب په کافي اندازه او په ښه توګه ونه شي، نو بدن او ذهن له ګڼو ستونزو سره مخ کېږي.
د بې خوبۍ زیانونه په لاندې توګه دي:
بي خوبي مو په ذهني ستونزو اخته کوي
که چېرې منظم خوب ونه کړی نو بي خوبي به مو د دماغ په فعالیتونو په مستقیمه توګه اغیز کوي. بي خوبي حافظه کمزوري کوي او تمرکز خرابوي.
همداراز، بې خوبي د ذهني فشار، خپګان، او ان شیزوفرینیا په څېر رواني ناروغیو د زیاتېدو لامل ګرځي.
بي خوبي مو فزیکي روغتیا زیانمنوي
بي خوبي د وینې فشار لوړوي او د زړه حملې خطر زیاتوي. بي خوبي د بدن معافیتي سیسټم کمزورۍ کوي او د ناروغیو اخته کیدو ګواښ سره مو مخ کوي.
بي خوبي مو په شکر ناروغۍ اخته کوي
بې خوبي د بدن د انسولین تولید اغېزمنوي، چې د شکر ناروغۍ د زیاتېدو سبب ګرځي.
بي خوبي مو وزن زیاتوي
که خوب مو منظم نه وي نو دا د خوب کمښت د اشتها زیاتولو هورمونونو تولید زیاتوي، چې د وزن زیاتېدو سبب ګرځي.
بي خوبي مو ټولنیزې او کاري ستونزې ډېروي
بې خوبي د انسان ټولنیز او مسلکي ژوند هم اغېزمنوي. خلک له بې خوبۍ سره له نورو سره د اړیکو په جوړولو کې ستونزې احساسوي. په کاري چاپېریال کې د بې خوبۍ ښکار خلک ډېری وخت تېروتنې کوي، نوښت او خلاقیت له لاسه ورکوي، او له ګڼو ستونزو سره مخ کېږي.
څنګه له بې خوبۍ ځان وژغورو؟
څېړونکو تل ویلي، هر انسان په نورمال ډول باید ۷ تر ۸ ساعته خوب وکړي. که منظم خوب نه لری نو د خوب لپاره منظم مهالویش جوړ کړئ. له موبایل او کمپیوټر څخه د خوب نه مخکې ځان لرې وساتئ.کافئین او نور محرک توکي د شپې له خوا مه مصرفوئ په خاصه توګه قهوه او انرژي څښاک.
همدا راز ، په ارامه او تته رڼا لرونکې چاپېریال کې خوب وکړئ.که بیا مو هم د بې خوبۍ ستونزه جدي وي، نو ډاکټر سره مشوره وکړئ.