د افغانستان د فوټبال اتلانو لیګ څلورم پړاو سیالیو کې نن د سې شنبې په ورځ لومړۍ لوبه د صرافان هرات او جوانان پیروزي تر منځ له ګول وهلو پرته مساوي شوه او دوهمه لوبه کې ابومسلم فراه لوبډلې سرسبز یاشلر فاریاب لوبډلې ته ۳ـ۱ ماتې ورکړه.
د افغانستان د فوټبال ملي فدراسیون د معلوماتو له مخې، نن سې شنبه د افغانستان د فوټبال اتلانو لیګ کې دوه لوبې ترسره شوي.
لومړۍ لوبه د صرافان هرات او جوانان پیروزي ترمنځ له ګول وهلو پرته ۰ـ۰ پای ته ورسیده.
خو په دوهمه لوبه کې ابومسلم فراه لوبډلې سرسبز یاشلر فاریاب لوبډلې ته ۳ د یو په مقابل کې ماتې ورکړه.
په دغه پړاو لوبو کې ابومسلم فراه لوبدلې سر پر سر څلور لوبې له کومې ماتې پرته ګټلې دي.
ابومسلم فراه لوبډله چې په خپل اصلي ترکیب کې د ملي لوبډلې د لوبغاړو ترڅنګ بهرني لوبغاړي هم له ځان سره لري په څلورو لوبو کې یې ۱۴ ګولونه وهلي او د ۱۲ لوبډلو په جدول کې د ۱۲ امتیازونو په لرلو سره پر لومړي مقام ده.
د څلورم پړاو اتلانو لیګ د نمرو په جدول کې اټک انرژي لوبډلې هم له ماتې خوړلو پرته څلور لوبې ګټلي دي او په دوهم مقام کې ځای لري.
