ازبکستان افغانستان ته د بریښنا د لیږد تړون د یو بل کال لپاره هم وغځاوه
د طالبانو تر واک لاندې د برښنا شرکت وایي چې له ازبکستان سره یې د بریښنا د لیږد تړون د یو بل کال لپاره غځولی دی.
د طالبانو تر واک لاندې د برښنا شرکت وایي چې له ازبکستان سره یې د بریښنا د لیږد تړون د یو بل کال لپاره غځولی دی.
دغه شرکت د سې شنبې په ورځ ویلي، چې د دغه شرکت مشر عبدالباري عمر تاشکند کې د ازبکستان د بریښنا د ملي شرکت له مشر سره د ۲۰۲۵ زیږدیز کال لپاره د بریښنا د لیږدولو قرار داد تمدید کړیدی.د طالبانو د بریښنا شرکت د یوې خبرپاڼې په خپرولو سره ویلي، چې د دغه قرارداد د لاسلیک کولو پر مهال د طالبانو د بهرنیو چارو او مالیې وزارتونو استازو هم ګډون کړی و.د بریښنا شرکت په خبرپاڼه کې راغلي: «د بریښنا شرکت پلاوي د قرار د تمدید تر څنګ له ازبکستان څخه افغانستان ته د ۵۰۰ کیلو ولټه بریښنا د لیږدولو په اړه هم خبرې اترې کړېدي.»په خبرپاڼه کې دا رنګه زیاته شوې چې دواړو غاړو هوکړه کړې، چې د یو لړ مسلکي او تخنیکي ارزونو وروسته به افغانستان ته د ۵۰۰ کیلو ولټه بریښنا بنسټیزې چارې چې له سرخان څخه پیلیږي او د پلخمري له لارې تر کابله رسیږي هم پیل شي.تر دې وړاندې د بریښنا شرکت له ترکمنستان سره هم د بریښنا د لیږد په اړه ورته قرارداد لاسلیک کړی و.خو د دغو قراردادونو د لاسلیک کولو سره، سره د افغانستان خلک لا هم په ډېرو ولایتونو او ان په پلازمېنې کابل کې د بریښنا د کموالي او نشتوالي شکایت کوي.ګڼ خلک وایي چې افغانستان د پریماته اوبو په لرلو سره لا هم بریښنا نه لري او د دې پر ځای چې په دې برخه کې بنسټیزې لارې چارې ولټول شي، افغانستان له ګاونډیو هیوادونو سره په دغسې قراردادونو نه شي کولای چې د خلکو ستونزې په سمه توګه غوڅې کړي. دغه خلک وایي د دغه شان قرار دادونو د لاسلیک کولو پر ځای دې پر سیندونو بریښنا کوټونه جوړ شي او د لمریزې او بادي بریښنا څخه ګټه واخیستل شي او په دغو برخو کې دې افغان پانګوال پانګونې ته وهڅول شي.
