د یونان سمندر کې د کښتۍ د ډوبیدو له امله اته کسان مړه شوي دي
د یونان په ختیځ کې د روډس ټاپو ته نږدې د پناه غوښتونکو د یوې کښتۍ د ډوبیدو له امله لږ تر لږه اته تنه وژل شوي او ۱۸ تنه نور ژغورل شوي دي.
د یونان په ختیځ کې د روډس ټاپو ته نږدې د پناه غوښتونکو د یوې کښتۍ د ډوبیدو له امله لږ تر لږه اته تنه وژل شوي او ۱۸ تنه نور ژغورل شوي دي.
د یونان ساحلي ګارد وویل، چې دغه بېړۍ د جمعې په ورځ د ډسمبر په ۳۰ مه د پولیسو د ګزمې له یوې کښتۍ څخه د تیښتې هڅه کوله چې په سمندر کې ډوبه شوه.
د یونان د ساحلي ګارد چارواکو ویلي، چې د ساحل ساتونکو کښتیو او چورلکو په کارولو سره د احتمالي ورک شويو پناه غوښتونکو د ژغورنې هڅې روانې دي او ټینګار کوي چې د دغو کسانو برخلیک لا هم معلوم نه دی.
دا په تېره یوه اونۍ کې د یونان په سواحلو کې د پناه غوښتونکو دویمه بیړۍ ده چې ډوبیږي.
د وړاندوینو له مخې په روان کال کې به د هغو پناه غوښتونکو شمېر چې په ناقانونه ډول یونان ته د رسېدو هڅه کوي له ۶۰ زرو څخه ډېر شي.
رسمي ارقام ښیې چې یونان ته د رسېدو تر ټولو لوی شمېر د سوریې پناه غوښتونکي، ورپسې بیا د افغانستان، مصر او فلسطین اتباع دي.
د افغانستان د اطلاعاتو او فرهنګ پخوانی وزیر عبدالباري جهاني وايي، د متحده ایالاتو د ویرجینیا ایالت محکمې د افغانستان د تېر جمهوري نظام د اطلاعاتو او کولتور وزارت پخوانی مرستیال هارون حکیمي پر ده له لګېدلو تورونو پاک اعلان کړ.
هارون حکیمي د ویرجینیا ایالت د پرېنس ویليام ښار پولیسو پر یوې ښځې د «جنسي تېري په تور» نیولی وو.
پر هارون حکیمي باندې یوې ۲۷ کلنې مېرمن په خپل کور کې د جنسي تېري تور پورې کړی وو.
د تېر جمهوري نظام د اطلاعاتو او کولتور پخواني وزیر عبدالباري جهاني په خپله ایکس خواله رسنۍ څو شېبې وړاندې لیکي: «د ویرجینیا د ایالت محکمې همدا اوس فیصله وکړه چې زما هارون جان بېګناه او له ټولو لګېدلو تورونو څخه پاک دی».
تر اوسه د پرېنس ویلیم ښار محکمې په رسمي ډول رسنیو ته څه نه دي ویلي.
د پرېنس ویلیام ښار د پولیسو په راپور کې ویل شوي وو، چې پولیس د روان کال د مارچ میاشتې په اتمه په دغه ښار کې یو کور ته ورغلي وو، چې د جنسي تېري د تور په اړه پلټنې وکړي.
پولیس وايي، هغه ۲۷ کلنه ښځه چې پر ښاغلي حکیمي یې د جنسي تېري تور لګولی و، د تورن په کور کې اوسېدله.
د پولیسو په راپور او د ۵ فاکس چینل په ګډون په امریکايي رسنیو کې نشر شوي مالومات ښيي، چې دغې ښځې د جنسي تېري له تور مخکې له ښاغلي حکیمي سره اړیکې درلودې.
د امریکا د متحدو ایالتونو په ګډون د لویدیځو هېوادونو د قوانینو له مخې، ان يوه ښځه د ګډې ملګرتيا په اړيکه کې هم د ملګري له جنسي اړیکو سره مخالفت کولی شي او همدا د تېري په اړه پولیسو ته راپور ورکولی شي.
ښاغلی حکیمي د اشرف غني د حکومت له نسکورېدو څو میاشتې وړاندې د ۱۴۰۰ کال د غويي په میاشت کې د افغانستان د اطلاعاتو او کلتور وزارت د مرستيال په توګه معرفي شوی و.
د بشري حقونو د څار سازمان وایي، چې اسراییلي چارواکو د غزې په تړانګه کې د نسل وژنې کړنې ترسره کړي دي.
د دغه سازمان په ۱۷۹ مخیز راپور کې راغلي، چې اسراییلي چارواکو په قصدي توګه د ۲۰۲۳ کال له اکتوبر میاشتې راهیسې په غزه کې فلسطینیان له اوبو څخه بې برخې کړي، چې په پایله کې یې زرګونه کسان وژل شوي او په دې توګه د بشریت ضد جنایت او د نسل وژنې اعمال ترسره شوي دي.
د یاد سازمان دغه راپور کې راغلي:« اسراییل په قصدي توګه په غزه کې فلسطینیان له اوبو څخه محروموي. د بشري حقونو د څار سازمان موندلي چې اسراییلي چارواکو په قصدي توګه په غزه کې فلسطینیان د څښاک او روغتیا ساتنې لپاره پاکو اوبو ته له لاسرسي څخه محروم کړي چې د لومړني انساني بقا لپاره اړین دي.»
راپور زیاتوي، چې اسراییل په قصدي توګه په غزه کې زیربناووې او برېښنا زیانمن کړي، پر بیارغوونکو یې برید کړی او غزې ته یې د بیارغونې موادو د ننوتلو مخه نیولې ده.
د بشري حقونو د څار ادارې اجراییوي مشرې تیرانا حسن وویل:«دا غفلت نه بلکې د محرومیت یوه قصدي پالیسي ده چې له امله یې په زرګونه کسان له تندې او ناروغۍ څخه مړه شوي، چې دا د انسانیت خلاف او له نسل وژنې سره برابره ده.»
هغې په وینا، دغه راپور په غزه کې د اوبو چارواکو، روغتیایي متخصصینو او کارکوونکو په شمول د لسګونو فلسطینیانو سره د مرکو او له دې سره سره د ۲۰۲۳ اکټوبر څخه تر ۲۰۲۴ سپټمبر د سټلایټ انځورونو د معلوماتو پر اساس جوړ شوی دی.
د متحده ایالاتو د مرکزي قوماندې مرکزي دفتر (سنټکام) اعلان کړی، چې د سوریې په دیرالزور کې په یوه هوايي برید کې د ابو یوسف په ګډون چې په محمود مشهور دی د داعش دوه غړي وژل شوي دي. سنټکام زیاته کړه، چې دغه عملیات د "ترهګرو" فعالیتونو د مخنیوي لپاره ترسره شوي.
د متحده ایالاتو د مرکزي قوماندې مرکزي دفتر په یوې خبرپاڼه کې وویل، چې د داعش یو جګپوړی غړی ابو یوسف د پنجشنبې په ورځ (د لېندۍ ۲۹مه) په یوه هوايي برید کې وژل شوی دی. مګر سنټکام د دغه کس د هویت په اړه نور جزییات نه دي ورکړي.
په خبرپاڼه کې راغلي: «دغه برید د سنټکام او سیمه ییزو شریکانو د پرله پسې ژمنې سره سم ترسره شوی چې د ملکي وګړو، د امریکا د پوځي ځواکونو، په سیمه کې زموږ د متحدینو او شریکانو په وړاندې د بریدونو پلان، تنظیم او ترسره کولو لپاره د ترهګرو هڅې شنډې او کمزورې کړي.»
همدا راز د سنټکام قوماندان مایکل اریک کوریلا وویل چې داعش هڅه کوي خپل له ۸ زرو څخه ډېر غړي چې د سوریې په زندانونو کې ساتل کیږي خوشي کړي. هغه ټینګار وکړ چې داعش ته به اجازه ورنه کړي چې د سوریې له اوسني وضعیت څخه ناوړه ګټه پورته کړي.
د اوکرایین د بهرنیو چارو وزارت ویاند هیورهي تیخي وویل، د مسکو په توغندیز برید کې په کییف کې شاوخوا د شپږو سفارتونو ودانۍ زیانمنې شوې دي. هغه وویل چې په دې برید کې د البانیا، ارجنټاین، فلسطین، شمالي مقدونیې، پرتګال او مونټه نګرو سفارتونو ته سخت زیان اوښتی دی.
د اوکرایین د بهرنیو چارو وزارت تایید کړه، چې روسیې د جمعې په سهار پر کییف یو لړ توغندیز بریدونه کړي چې له امله یې یو کس وژل شوی او ۱۲ نور ټپیان شوي دي.
اوکرایني چارواکو وویل، چې د دغه هېواد پر پلازمېنه د شمالي کوریا کې این ۲۳ بالسټیک د پنځو توغندیو برید شوی دی. د اوکراین د بهرنیو چارو وزارت ویاند وویل: «د دې سفارتونو کړکۍ، دروازې او چت چې په یوې ډېپلوماټیک کمپلکس کې موقعیت لري، سخت زیان لیدلی.»
د اوکراین د بهرنیو چارو وزارت ویاند هیورهي تیخي پر ډېپلوماتیکو بنسټونو د روسیې برید «وحشیانه» بللی دی. هغه زیاته کړه چې په دې برید کې چاته مرګ ژوبله نه ده اوښتې.
د جمعې په سهار د کییف د پوځي ادارې مشر سرګي پاپکو اعلان وکړ چې روسي ځواکونو په دغه برید کې اته توغندي کارولي چې په کې کینژال مافوق صوت توغندي او (کې این ۲۳) بالسټیک توغندي شامل دي.
ځايي چارواکو او د اوکراين هوايي ځواک وویل، چې د دغه هېواد هوايي دفاعي سيستم له دغو توغندیو سره په مقابله کې و. همدا راز عیني شاهدانو رویټرز ته ویلي، چې د اوکراین د هوايي ځواک له خبرتیا وروسته د کییف په بېلابېلو برخو کې د څو چاودنو غږونه اورېدل شوي دي.
دا برید په داسې حال کې شوی چې د روسیې او اوکراین ترمنځ کړکېچ لا هم دوام لري او کییف په وار وار د روسیې د هوايي بریدونو د زیاتوالي خبرداری ورکړی دی.
د یونیسف یوې استازې نن په جنیوا کې خبرې غونډې ته ویلي، چې په غزه کې ۹۶ سلنه ښځې او ماشومان خپلې اساسي خوراکي اړتیاوې نشي پوره کولی. نوموړې ویلي، چې “سړه هوا، ناروغي او زیان” په غزه کې د ماشومانو لپارره د یو بد خوب په شان دي.
د ملګرو ملتونو د ماشومانو د ملاتړ صندوق(یونېسف) د اړیکو مسولي روسېلا بولین په جنیوا کې رسنیو سره په خبرو کې ویلي، چې د غزې ماشومان یخ وهلي، ناروغ او تاوان یې لیدلي.
د نوموړې په خبره لوږه او خوار ځواکي او په پراخه کچه د ژوند ناوړه شرایطو د ماشومانو ژوند له خطر سره مخامخ کړی دی.
روسېلابولین ویلي:«همدا اوس په غزه کې له ۹۷ سلنې ډیرې ښځې او ماشومان نه شي کولی خپلې اساسي تغذیې اړتیاوې پوره کړي. ډیری یې په مرسته شویو اوړو، دالو، مکروني او خوږو خوړو ژوند کوي. دا ورو ورو د دوی روغتیايي رژیم ته زیان رسوي.»
نوموړې په خپلو خبرو کې ویلي، چې په تېره نومبر میاشت کې د خوراکي توکو بار یوازې ۶۵ لارۍ غزې ته تللې دي، په داسې حال چې تر جګړې مخکې، چې لاهم غزه کې د خوراکي توکو تولید فعاله و، هره ورځ ۵۰۰ د خوراکي توکي بار لارۍ غزې ته تلې.
روسېلابولین وايي، د غزې شمالې برخه د تېرو ۷۵ ورځو راهیسي کلابند ده او له تېرو ۱۰ اونیو راهیسې ماشومانو ته د بشري مرستو لیږد ستوزمن شوی دی.
نوموړې زیاته کړه«غزه د ځمکې پر مخ یو له یو زړه بوږنونکو او خطرناکو سیمو څخه ده. د ماشومانو د ژوند ژغورلو لپاره هره کوچنۍ هڅه له ویرانۍ سره مخ کیږي. د ۱۴ میاشتو راهیسې ډیر ماشومان د دې ناورین په خورا سخت حالت کې دي. د راپورونو له مخې، په غزه کې له ۱۴۵۰۰ څخه ډير ماشومان وژل شوي او زرګونه نور ټپیان شوي دي.»
د ملګرو ملتونو د ماشومانو د ملاتړ صندوق دغه استازې په خپلو خبرو کې خبریالانو ته ویلي، چې د کال پای دی په نړۍ کې نورې کورنۍ د سولې او یووالي لمانځلو تابیا نیسي، خو په غزه کې له یو میلیون زیات ماشومان په ویره او بشپړ محرومیت کې ژوند کوي.
نوموړې وویل:« په غزه کې د ماشومانو په وړاندې جګړه زموږ د ګډ مسولیت یادونه ده. د ماشومانو یو نسل د دوی له حقونو د وحشیانه سرغړونکو او د خپل راتلونکي د له منځه وړل ویني.»
د ملګرو ملتونو د ماشومانو د ملاتړ صندوق د اړیکو مسولې خبرداری ورکړ؛ چې په غزه کې روان وضیعت له ماشومانو د ژوند کولو یوه ورځ غلا کوي.
نوموړې وویل، چې د غزې د روان وضعیت په کنټرول کې هر ځنډ د ډیرو کسانو ژوند اخلي او د غزې ماشومان نور د روان ناورین زغم نه لري.
د ۲۰۲۳ کال اکتوبر کې د اسراییل پر سوېل د حماس په برید پسې تل ابیب پر غزه برید کړی چې لا هم روان دی. سره له دې چې مختلفو خواوو د اوربند هڅې کړې، خو لا هم بریالي شوي نه دي.