انډیپنډېنټ وايي، پخواني طالب جنګیالي اوس د نړۍ د ماین پاکۍ تر ټولو سترې خیریه موسسې سره د هغو بمونو او ماینونو په موندلو کې مرسته کوي، چې دوی د جمهوري حکومت او ناټو او امریکايي ځواکونو د حضور پرمهال د افغانستان په بېلابېلو سیمو کې ښخ کړي دي.
د هیلو ټرسټ یو تن مسوول وايي، کله چې دوی په کندهار کې د یوه سړک غاړې ماین د پلټنې لپاره لاړل د دوی د کاروان یوه امنیتي ساتونکي په ناببره توګه بم ته اشاره وکړه او ویې ویل «دا ما دلته اېښی و».
دغه امنیتي ساتونکي، چې پخوا طالب جنګیالی و او اوس د سیمې له پولیسو سره کار کوي، وروسته په یوه بله سیمه کې هم هغه ځایونه په ګوته کړل چې دوی نور ماینونه پکې ځای پرځای کړي وو.
دغه موسسه، چې مرکز یې په ډمفریشایر کې دی، له ۱۹۸۸ کال راهیسې په افغانستان کې فعالیت کوي او په دې موده کې یې تر ۸۰۰ زرو ډېر ماینونه شنډ کړي دي.
د انډیپنډنټ د رپوټ له مخې، په افغانستان کې د طالبانو له واکمنۍ وروسته امنیتي وضعیت ښه شوی، خو د ښځو د حقونو په برخه کې لا هم د نړۍ تر ټولو سخت محدودیتونه لري.
د هیلو ټرسټ د پروګرام مدیر کالوم پیبلز وویل، « ډېری طالب جنګیالي چې ما ورسره خبرې کړې دي وایي چې جګړه پای ته رسېدلې او اوس غواړي افغانستان ورغوي».
هیلو ټرسټ له سیمه ییزو خلکو سره نږدې اړیکې تینګې کړې او دې چارې د باور په رامنځته کولو کې مرسته کړې ده.
په جګړو کې طالبانو ډېری د سړکونو په شاوخوا کې د وسایطو او پرسونل ضد بمونه ځای پرځای کول.
کالوم پیبلز یادونه وکړه، « موږ حتاله بم جوړوونکو سره خبرې کړې دي، دوی موږ ته تشریح کړي چې ولې یې خاص ځایونه د بم ځای پر ځای کولو لپاره غوره کړي وو او د دوی د تاکتیکونو منطق څه و».
د راپورونو له مخې، د ۲۰۲۴ کال په لومړیو کې هره میاشت شاوخوا ۶۰ ماشومان د هغو ماینونو او چاودېدونکو توکو له امله وژل شوي یا ټپیان شوي، چې له تېرو څو لسیزو جګړو پاتې دي.
د هیلو ټرسټ موسسې په وینا، دوی اوس د افغانستان په ۲۵ ولایتونو کې فعالیت کوي او د ماین پاکۍ په برخه کې یې پرمختګ چټک شوی دی.
له هیلو ټرست سره د طالبانو د بم اېښودونکو همکاري داسې مهال ده، چې دې ډلې له ۲۰۰۱ کال نه تر ۲۰۲۱ کال پورې په افغانستان کې د مرګونو ځانمرګو بریدونو، سړک غاړې بمي چاودنو او بوشکه یې بمونو مسوولیت پرغاړه اخستی چې په زرګونو خلک یې وژلي او معیوب کړي دي.
