د م. م د کډوالو عالي کمېشنري: سلګونه زره افغانان له ایرانه په جبري توګه ستانه کړای شوي دي
د ملګرو ملتونو د کډوالو عالي کمېشنري وایي، چې په سلګونو زره افغانان له ایران څخه افغانستان ته ستانه شوي چې ډېری یې بېرته ستنېدو ته اړ اېستل شوي دي.
د ملګرو ملتونو د کډوالو عالي کمېشنري وایي، چې په سلګونو زره افغانان له ایران څخه افغانستان ته ستانه شوي چې ډېری یې بېرته ستنېدو ته اړ اېستل شوي دي.
د اسیا لپاره د ملګرو ملتونو د کډوالو عالي کمېشنري دغه ځرګندونې پر اېکس پاڼه د دغه بنسټ د یوې چارواکې کارولین ګلوک د ویډیو په خپرولو سره کړې دي.
کارولین ګلوک په دغې ویډیو کې ویلي، چې په تېر کال کې سلګونه زره کسان افغانستان ته ستانه شوي دي.
هغه وایي، ایراني چارواکو ویلي پلان لري چې د ۲۰۲۵ کال له مارچ میاشتې څخه دوه مېلیونه بې اسناده کډوال له دغه هېواده وباسي.
د نوموړې په وینا، د راستنېدونکو کسانو شمېر له تېرې سپتمبر میاشتې راهیسې د پام وړ زیات شوی دی؛ خو د طالبانو شمېرې برعکس په تېرو دوو میاشتو کې کموالی ښیي.
نوموړې وایي: «د ملګرو ملتونو د کډوالو عالي کمېشنري، د کډوالو په خپله خوښه راستنېدو ټینګار کوي او غواړي چې کډوال په امن فضا کې په خپله خوښه خپل وطن ته راستانه شي.»
هغه وایي، په سیمه کې له همکارو بنسټونو سره د بشري مرستو په برخه کې په ګډه کار کوي او ښایي ډېری په زور ستانه شوي کډوال په ځانګړې توګه ښځې او نجونې جدي ملاتړ او پاملرنې ته اړتیا ولري.
هغې دا رنګه ویلي، چې دغه کډوالو سره نغدي مرستې هم کېږي.
هغه زیاتوي، چې هغو سیمو ته به خپلو مرستو ته دوام ورکړي؛ کومو کې چې ډېری بېرته راستانه شوي کډوال مېشت دي.
دغه سازمان تر دې وړاندې هم ویلي و، چې هره اوونۍ د ایران له پولې افغانستان ته لسګونه زره افغانان راړول کېږي، چې له ګڼو بشري ستونزو او ننګوونو سره مخامخېږي.
د راپورونو له مخې، له ایرانه په جبري توګه په راېستل شویو افغانانو کې د پخواني جمهوري نظام یو شمېر سرتېري هم شامل وو، چې خپلو سیمو ته تر رسېدو وروسته یې ځینې طالبانو په نښه کړي او وژلي دي.
په دې وروستیو کې ایراني ځواکونو یو شمېر افغانان وژلي، شکنجه کړي او د زنداني کېدو تر څنګ یې ان په دار هم ځړولي دي.
