د خیبر پښتونخوا په پاړه چنار کې ځایي خبریالان وایي له هغه مهاله چې د پاړه چنار او پیښور تر منځ لویه لاره بنده شوې ورسره د خوراکي توکو تر څنګ په روغتونونو کې هم دارو درمل کم شوي او ناروغان پر وخت روغتیایي مرکزونو ته نه شي رسیدلای.
لسګونه ماشومان مړه شوي چې ډېر یې په لرو پرتو کلیو او باڼډو کې اوسیدل.
سره له دې چې له تېرې یوې اونۍ را په دې خوا په سیمه کې پراخ اعتراضونه او پرلتونه روان دي، او ګڼ جرګه ماران هم پاړه چنار ته د تړلو لارو د خلاصون په چارو بوخت دي، خو لا هم دغې ولسوالۍ ته ټولې لارې تړلې دي او په بازارونو کې خوراکي او سون توکي خلاص شوي او په روغتونونو کې هم درمل نه پیدا کیږي.
تر دې وړاندې ایدهي مرستندویه بنسټ د پاړه چنارـ پېښور ترمنځ د لارې بندیدو له امله پېښور ته د ناروغانو او نورو کسانو د انتقال په موخه هوايي الوتنې پیل کړې وې چې په لومړۍ الوتنه کې ۱۴ ناروغان پېښور ته انتقال شوي وو.
خو له هغې وروسته د دغو الوتنو په اړه نور جزییات نه دي خپاره شوي.
سیمه ایز خبریالان وایي چې په لرې پرتو کلیو او بانډو کې د ناروغانو په تېره بیا د ناروغو ماشومانو وضعیت د زیاتې اندېښنې وړ دی او تر ډېره له دغو کلیو بانډو څخه د مړو شویو ناروغانو راپورونه نه خپریږي.
دغه خبریالان وایي ګڼې کورنۍ نه شي کولای چې خپل ناروغان تر پاړه چناره هم ورسوي، ځکه د دوی په وینا ټولې لارې تړل شوې او ان تر دې چې د موټرو لپاره د تیلو په ټانکونو کې هم تیل خلاص شوي او ترانسپورټ هم په ټپه درېدلی دی.
د سیمې اوسیدونکي په صوبایي او مرکزي حکومت تور پورې کوي چې د لارو د بندیدو څخه تر ۷۰ زیاتې ورځې تېرې شوې، خو لا هم دغه تړل شوې لارې ی خلاصې نه کړې او حکومتي چارواکي په کراره لاس تر زنې ناست دي او د خلکو د مړینې ننداره کوي.
