د فلسطین د بیځایه شویو وګړو لپاره د ملګرو ملتونو د مرستو رسولو سازمان د سې شنبې په ورځ وویل چې د اسراییل له برید وروسته تر دې مهاله له ۱۴ زره او ۵۰۰ تنو زیات ماشومان وژل شوي دي. د دغه سازمان په خبره په هر یو ساعت کې یو ماشوم وژل کیږي.
نروا د سې شنبې په ورځ پخپله اېکس پاڼه د غزې د وژل شویو ماشومانو شمېرې خپرې کړې او ورسره یې ولیکل چې «د ماشومانو وژنه په هیڅ ډول د منلو نه ده.»
د دغه سازمان په خبره، هغه ماشومان چې ژوندي پاتې دي، د روحي او جسمي پلوه سخت زیانمن شوي دي.
تر دې وړاندې د ځینو نړیوالو بنسټونو څېړنو ښودلې وه چې د دغې سیمې ۹۶ سلنه ماشومان داسې انګیري چې د هغوی مرګ نږدې شوی دی.
په دغې څېړنه کې چې د غزې د ۵۰۰ ماشومانو سره له خبرو وروسته تر سره شوې وه راغلي، چې ۴۶ سلنه ماشومان له هغو رواني او جسمي زیانونو له امله چې ورپېښ شوي، په خپل مرګ راضي شوي او د مرګ لپاره شیبې شمېري.
