طالبان وايي د دې ډلې د بهرنیو چارو وزیر د سوریې د لنډمهالي حکومت له بهرنیو چارو وزیر سره ټلیفوني خبرو کې د بښنې او ښې حکومتولۍ دریځونه وستایل. امیر خان متقي په داسې مهال نوي واکمن ستايي، چې د دوی خلاف یې نه ملي اردو ړنګ کړ او نه یې د ښځو او نجونو پر کار او زدکړو بندیز ولګاوه.
د طالبانو د بهرنیو چارو وزارت ویاند وايي، امیرخان متقي نن د سوریې د انتقالي حکومت د بهرنیو چارو وزیر اسعد حسن الشیباني سره ټیلیفوني خبرې وکړې.
ضیا احمد تکل خپل اېکس کې زیاتوي، ښاغلي متقي نوموړي ته پر مبارکي سربېره «د سوریې حکومت د عفوې او ښې حکومتولۍ لپاره دریځونه وستایل.»
په دې خبرو کې امیر خان متقي د افغانستان او سوریې ترمنځ د ښو اړیکو هیله کړې او طالبان وايي، مقابل لوري هم د ورته ژمنو خبره وکړه.
د سوریې نوی حکومت د بشار اسد رژیم پرځېدو پسې د ډیسمبر پر اتمه پر دمشق واکمن دی.
سره له دې چې دا حکومت له څو توندلارو ډلو جوړ دی، خو د طالبانو خلاف یې نه د خپل هېواد ملي اردو ړنګ کړ او نه یې د ښځو پر کار او د نجونو پر زدکړو بندیز ولګاوه.
په دې ډلو کې د تحریر الشام مشر چې په دمشق کې یې واک په لاس کې اخیستی وايي، چې نه غواړي په سوریه کې د طالبانو په څېر حکومت جوړ کړي.
ابو محمد جولاني وویل، چې د طالبانو د مشرانو په څیر به د ښځو او نجونو د تعلیم مخه ونه نیسي.
نوموړي د واک لومړیو ورځو کې له خپلو وسلوالو وغوښتل چې خپلو مرکزونو ته ستانه شي او امنیتي چارې حکومتي ځواکونو ته پرېږدي.
