له سیمې باوري سرچینو افغانستان انټرنشنل پښتو ته ويلي، چې تېره شپه له یوې بجې وروسته پر ډیورنډ کرښه د پکتیا مقبلو په غرنۍ سیمه کې د طالبانو او پاکستاني عسکرو تر منځ ډزې شوې دي. تر اوسه پورې د اوښتو زیانونو په اړه معلومات نه دي ورکړل شوي.
افغانستان انټرنشنل پښتو ته نن جمعه د (مرغومي اوومه) له سیمې باوري سرچینو ويلي، چې تېره شپه له یوې بجې وروسته پر ډیورنډ کرښه د پکتیا ډنډي پټان ولسوالۍ مقبلو غرنۍ سیمه کې د طالبانو او پاکستاني عسکرو تر منځ ډزې شوې دي.
وايي، په دغه نښته د سپکو او درنو وسلو غږونه اوریدل شوي.
تر اوسه پورې نه طالبانو او نه هم پاکستاني لوري په رسمي ډول په اړه څه نه دي ویلي.
په خواله رسنیو کې یوه ويډیو لاس په لاس کیږي چې په کې د درنو او سپکو وسلو غږونه اوریدل کیږي او خلک یې د تېرې شپې د جګړې ویډیو یادوي.
درې ورځې وړاندې پاکستاني جنګي الوتکو د افغانستان د پکتیکا ولایت په برمل ولسوالۍ کې په څو ځایونو بمبار وکړ چې د طالبانو حکومت په خبره تر ۵۰ ډیر ولسي خلک په کې ووژل شول.
ځینې طالبانو ويلي، چې د دغه برید غچ به له پاکستانه اخلي.
پاکستاني لوري بیا دعوه کړې چې په دغه برید کې د ټي ټي پي څو مرکزونه په نښه کړي او لسګونه د ټي ټي پي وسله وال یې وژلي دي.
