نورالدین عزیزي: هوکړه شوې چې له قزاقستان سره سوداګري درې میلیارده ډالرو ته لوړه شي
د طالبانو د سوداګرۍ وزیر نورالدین عزیزي د پنجشنبې په ورځ (د مرغومي ۶مه) په کابل کې یوه خبري غونډه کې وویل، هوکړه شوې چې له قزاقستان سره د سوداګرۍ کچه لوړه شي.
د طالبانو د سوداګرۍ وزیر نورالدین عزیزي د پنجشنبې په ورځ (د مرغومي ۶مه) په کابل کې یوه خبري غونډه کې وویل، هوکړه شوې چې له قزاقستان سره د سوداګرۍ کچه لوړه شي.
هغه زیاته کړه، چې د افغانستان او قزاقستان ترمنځ هوکړه شوې چې د سوداګرۍ کچه له یوه میلیارډ ډالرو څخه درې میلیارډ ډالرو ته لوړه شي.
د دغه طالب چارواکي په وینا، دغه هوکړه له قزاقستان څخه کابل ته د یوه پلاوي د سفر پر مهال شوې ده.
هغه زياته کړه، چې د قزاقستان له پلاوي سره د خبرو پر مهال د افغانستان او قزاقستان تر منځ د سوداګرۍ حجم درې ميليارد ډالرو ته په لوړولو ټينګار شوى دى.
د نورالدین عزیزي په وینا، د قزاقستان تېل، د څارویو خوراکي توکي، موټرې او کرنیز ماشینونه هغه څه دي چې قزاقستان به یې افغانستان ته صادر کړي.
په قزاقستان کې د افغاني محصولاتو د خرڅلاو د مرکزونو جوړول یو له هغو نورو شیانو څخه دی چې د طالبانو د سوداګرۍ وزیر په وینا پرې توافق شوی دی.
په ورته وخت کې د سوداګرۍ وزارت ویلي، چې قزاقستان لېواله دی چې د افغانستان په بېلابېلو کانونو کې پانګونه وکړي.
د قزاقستان د دولتي او خصوصي سکتور پلاوي، د دغه هېواد د سوداګرۍ او ادغام د مرستیال قیرات تربایف په مشرۍ د دوشنبې په ورځ (د مرغومي ۳مه) کابل ته سفر وکړ.
