د غزې روغتیا وزارت وايي، په تېرو ۲۴ ساعتونو کې د فلسطین په خاوره کې ۴۸ تنه وژل شوي چې له دې سره د جګړې د ټولو وژل شویو کسانو شمېر ۴۵ زره او ۴۸۴ تنو ته ورسېد. دغه وزارت زیاتوي، چې د تېرو ۱۴ میاشتو په جګړو کې لږ تر لږه ۱۰۸ زره او ۹۰ کسان ټپیان شوي.
غزه کې د روغتیا وزارت ویلي، د شنبې په ورځ د غزې په تړانګه کې د اسراییل په بمباریو کې ۱۸ فلسطینیان وژل شوي چې لږ تر لږه نهه یې د غزې په مرکزي برخه کې د پنډغالي په یوه کور کې ووژل شول.
د اسراییل پوځ د شنبې په ورځ وویل، چې د غزې په شمال کې یې د بیت حانون په سیمه کې د هدفونو پر ضد د شپې عملیات پیل کړي دي.
په تېرو څو میاشتو کې اسراییلي ځواکونو د جبالیه، بیت حانون او بیت لاهیه په شمالي ښارونو کې خلک له کورونو اېستلي او ډېرې سیمې یې له منځه وړې دي.
له بل پلوه د ناروې بهرنیو چارو وزارت وایي، چې دغه هېواد پر اسراییل د فشار راوړلو لپاره له څو لارو کار اخلي.
د دغه وزارت په وینا: «موږ یو سیاسي مکلفیت لرو، چې باید د فلسطین په حق کې خبرې وکړو.»
