د استوګنې د حقونو اړوند د ملګرو ملتونو ځانګړي راپور ورکوونکي د یکشنبې په ورځ د (مرغومې نهمه) خبرداری ورکړی چې د ژمي روان موسم کې یو میلیون فلسطینیان سرپناه نه لري. هغه ویلي ماشومان د یخنۍ له امله کنګل کیږي او بیا مري چې دا یو لوی انساني ناورین دی.
بالاکریشنان راجاګوپال د کنایې په ډول ویلي، دا د اسراییل چې د «نړۍ اخلاقي پوځ» ګڼل کېږي یوه بله لاسته راوړنه ده.
په فلسطین کې د اسراییلي ځواکونو د جګړې له کبله د سلګونه زره ملکي وګړو کورونه ویجاړ شوي او په دغو جګړو کې تر ټولو ډېره مرګ ژوبله ماشومانو ته اوښتې ده.
د ملګرو ملتونو دا تازه اندیښنې په داسې حال کې دي چې په وروستیو ورځو کې درې کوچنیان په غزه کې د سړې هوا له کبله مړه شوي دي.
