د چابهار امنیه قوماندان ویلي، چې شل سوداګریز مرکزونه «بې اسنادو وګړو» ته د دندې ورکولو له امله تړل شوي. احمدثمره حسیني وویل، «نهه تنه بې اسنادو وګړي چې په دغو کاروبارونو کې په دندو بوخت وو، د دوسیې تر ثبتولو وروسته عدلي او قضايي ارګانونو ته سپارل شوي.»
ایراني چارواکي معمولا افغان کډوالو ته د «بې اسنادو وګړو» اصطلاح کاروي.
احمدثمره حسینی ایرنا خبری اژانس ته وویل: «د سوداګریزو اتحادیو د محصولاتو او خدمتونو د وړاندې کولو د کنټرولولو لپاره د چابهار د سیمه ییزو پولیسو افسرانو د قضایه قوې له استازی سره په دغه ښار کې له فعالو تجارتی اتحادیو څخه کتنه وکړه.»
د هغه د څرګندونو له مخې، د دغه سفر په ترڅ کې شل سوداګريز مرکزونه چې د استوګنې له اسنادو پرته يې بهرني کډوال په کار ګومارلي و، د عدلي او قضايي پلاوي په شتون کې وتړل شول.
د ایران حکومت د چارواکو په وینا، په پام کې ده چې د روان کال تر پایه دوه میلیونه افغان کډوال له ایرانه وویستل شي.
