په بدخشان کې د طالبانو نوی حکم؛ ږیرې مه خرېیئ او ویښتان د «انګریزانو په څېر» مه جوړوئ

د طالبانو د لوړو زده کړو وزير ندامحمد نديم د پنجشنبې په ورځ د دغې ډلې تر واک لاندې د حکومت د رسنيو په دفتر کې د خبريالانو او رسنیو له استازو سره د همغږۍ پر پیاوړتيا، د حقایقو پر انعکاس او د «مثبتو پيغامونو» د وړاندې کولو په اړه ناسته کړې.

نديم په ټولنه کې د رسنيو پر اهمیت خبرې کړې دي او له ټولو خبريالانو او د رسنیو له مسوولانو یې غوښتي، چې په دې اړه خپل رسالت په سم ډول سرته ورسوي.

نوموړي د ملي ګټو په پام کې نیولو سره د هېواد وګړو ته د عامه پوهاوي، د تعليمي پروګرامونو او مثبتو پيغامونو وړاندې کول د رسنيو دنده بللې.

نديم د رسنیو له استازو غوښتي، چې په خپلو چارو کې له دقت، توازن او صداقت کار واخلي.

هغه زیاته کړې: «د اسلامي ژورنالېزم مسلک او د موجوده نظام له پالیسي سره سمې خپرونې وکړئ، په خبرونو او خپرونو کې له افترا، توهین او دروغو خپرولو څخه چې په هیڅ دین کې ځای نه لري ډډه وکړئ.»

له هغه وروسته، چې د طالبانو مشر په رسنيو کې پر انځور اخيستلو او نشرولو بنديز ولګوی یو شمېر طالب وزيران ان په خپلو اعلاميو کې د خپلو ورځنيو راپورنو د انځورونو نشرول هم بند کړل.

د طالبانو د لوړو زده کړو وزارت په ډېرو غونډو او ناستو کې د خبريالانو د ګډون مخه هم ونیول.

بل لوري بيا د یو شمېر طالب چارواکو په ګدون شېرمحمد عباس ستانکزي د لېندۍ په ۲۸ مه په کابل کې په یوه غونډه کې پر رسنیو قیودات زیانناک ګڼلي او له طالبانو وغوښتل، چې رسنۍ دې ازادې پرېږدي.

دغه طالب چارواکي خبرداری ورکړ، چې پر رسنیو محدودیتونه او زیاتې نیوکې د ګټې پر ځای زیان رسوي.

عباس ستانکزي ويلي: «زما غوښتنه له حکومت او اسلامي امارت څخه دا ده، چې زموږ رسنۍ پیاوړې او ملاتړ یې وکړي.»

حامد کرزي د پنجشنبې په ورځ د مرغومي پر ۱۳مه پر خپل اېکس ولیکل: « زه په نیو اورلیانز کې د نوي کال د خوشحالۍ پر مهال پر خلکو شوی برید په کلکه غندم. د قربانیانو له کورنیو سره خپله ژوره خواخوږي څرګندوم. د متحده ایالاتو خلکو ته خپلې نیکې هیلې وړاندې کوم».

دغه برید، چې د کال پر لومړۍ ورځ ترسره شوی، د چارواکو په وینا ۱۵ کسان یې وژلي او ګڼ نور یې ټپیان کړي.

په نیو اورلیانز کې دې پېښې د ښار د مشهورو جشنونو فضا اغېزمنه کړې ده.

د امریکا پوځ د چارشنبې په ورځ په رسمي توګه وویل چې بریدګر ۴۲ کلن شمس الدین جبار د تګزاس اوسیدونکي یو پیک اپ موټر د نیو اورلیانز ښار په زړه کې پر هغو خلکو خېژولی، چې د نوي کال د جشن نمانځلو ته راغونډ شوي وو.

جبار ۱۳ کاله د امریکا په پوځ کې دنده ترسره کړې وه او یو ځل افغانستان ته هم استول شوی و.

د پاکستان د بهرنيو چارو وزارت ویاندې ممتاز زهرا بلوڅ د پنجشنبې په ورځ په خپل وروستي کاري اونيز خبري کنفرانس کې وويل، چې د هند د ځمکنيو وژنو او اختطافونو شبکه اوس نړيواله شوې او ګڼ هېوادونه یې پر فعالیتونو اندېښمن دي.

امنه بلوڅ په فرانسه کې د پاکستان د نوې سفیرې په توګه ټاکل شوې ده.

د نوموړې پرځای په روسیه کې د پاکستان مخکینی سفیر شفقت علي خان د نوي ویاند په توګه ټاکل شوی.

زهرا بلوڅ د خپل وروستي کنفرانس پرمهال وویل، چې پاکستان د افغانستان په ګډون له ټولو ګاونډيانو سره دوستانه اړيکي غواړي.

بلوڅ له افغانستان سره د اړيکو په اړه زياته کړه: « پاکستان له افغانستان سره د خبرو اترو يو پياوړى ميکانيزم لري او غواړي له دغه ګاونډي هېواد سره د دوه اړخيزو اړيکو په ټولو اړخونو کې د امنيت او د پولو د مديريت په ګډون خبرو اترو ته دوام ورکړي.»

د پاکستان بهرنیو چارو وزارت ویاندې وویل، چې هېواد یې د هر ډول داخلي او بهرنیو ګواښونو پر وړاندې د ملي امنیت او حاکمیت د دفاع توان لري.

د يوې پوښتنې په ځواب کې وياندې بلوڅ وويل چې گوادر بندر د چين په مرسته جوړ شوی او د پاکستان دپرمختګ لپاره دى، خو هغې د چین حضور ته په اشاره وویل، چې پاکستان هیڅ داسې طرح نه لري چې کوم بهرني حکومت یا ادارې ته پوځي اډې ورکړي.

له دې وړاندي د پاکستان د ملي اسمبلۍ غړي شېرافضل مروت ويلي و، چې دغه هېواد امریکا ته د افغانستان او ایران پولو ته څېرمه په بلوچستان کې دوه هوايي اډې ورکړې دي.

د بریټانیا مشهور شنونکی پییرز مورګن وایي چې بریټانیا باید د طالبانو رژیم پر ضد اخلاقي دریځ ونیسي او له ښځو سره ددې ډلې د ظلمونو پر وړاندې له افغانستان سره ونه لوبیږي.

له دې وړاندې اسټرالیا هم په همدې لامل له افغانستان سره له لوبو انکار کړی و.

د اتلولۍ جام چې د فبرورۍ له۱۹مې نه تر مارچ تر نهمې پورې په پاکستان او متحده عربي اماراتو کې ترسره کیږي، د نړۍ اته لوبډلې پکې لوبیږي.

بریټانیا د بي ګروپ برخه ده چې له استرالیا، سویلي افریقا او افغانستان سره لوبیږي.

پییرز مورګن په دې اړه پرخپل اېکس نظر څرګند کړی او ویلي یې دي، چې « د بریټانیا لوبډله باید د فبرورۍ پر۲۶ نیټه د اتلولۍ جام ګروپ پړاو کې له افغانستان سره خپله لوبه لغو کړي. له افغان ښځو سره د طالبانو ناوړه کړنې او پرله پسې ظلمونه، په ځانګړې توګه د ورزش په ټولو برخو کې د هغوی پر ګډون بندیز، د زغملو وړ نه دي. دا وخت دی چې موږ خپل دریځ ونیسو».

کاروونکو هم له مورګن سره همغږي ښودلې او د بریتانیا له لومړي وزیر کییر سټارمر څخه یې غوښتنه کړې چې د افغانستان پر وړاندې په ټولو ورزشي لوبو کې د پرېکون ملاتړ وکړي.

د افغانستان ښځینه کرکټ لوبډله چې د طالبانو له واکمنۍ وروسته له هېواده تېښتې ته اړه شوې، اوس په نړیوالو سیالیو کې برخه نه اخلي.

ځینو افغان کرکټ لوبغاړو د طالبانو د کړنو پر ضد خپل غږ پورته کړی دی.

د پاکستان دفاع وزیر خواجه اصف له طالب چارواکو غوښتي و، چې پاکستان ته د وسله والو د نه ستنېدو ضمانت ورکړي، خو یادې ډلې مثبت ځواب ور نه کړ.

د طالبانو تر کنټرول لاندي ملي ټلویزيون د پنجشنبې په ورځ د دې ډلې د مرستيال ویاند حمدالله فطرت له قوله د پاکستان د دفاع وزير خواجه اصف خبرو ته په غبرګون کې ویلي، چې « د تاسف ځای دی، چې د پاکستان لوړپوړي چارواکي دغه ډول څرګندونې کوي.»

نوموړي د پاکستاني طالبانو د تحریک د انتقال اړوند له پاکستان نه د لس میلیارده روپیو اخیستلو خبرې هم رد کړې دي.
د جیو نیوز ټلویزیون مشهور ویاند حامد میر د چارشنبې په ورځ له خواجه اصف سره د خپلې مرکې یوه برخه خپره کړې.
په دې مرکه کې د پاکستان د دفاع وزیر ويلي و: « وروسته له دې چې طالبان واک ته ورسېدل، زه افغانستان ته لاړم او د طالبانو له دفاع وزیر او د هغوی له نورو مشرانو سره مې وکتل. ما دوی ته وویل چې که ترهګر متوقف نه شي، موږ به اقدام وکړو او باید وروسته شکایت ونه کړئ.»
پاکستان له دریو کلونو راهیسې لږ تر لږه دوه ځله د افغانستان اوسنۍ سرحدي سیمې بمباري کړې دي.
دغه هېواد ویلي، چې د بریدونو موخه د تحریک طالبان پاکستان غړي دي چې په دغو سیمو کې پناه ځایونه لري، خو افغان طالبان د پاکستان دا ډول کړنې د یوه بل هېواد پر حریم تېری بولی او په غبرګون کې يې د ورته بریدونو ګواښونه کړي.