د بښنې نړۍوال سازمان وایي، په غزه کې دې د فلسطینیانو په وړاندې د اسراییل نسل وژنه پای ته ورسېږي. دغه سازمان د یوې خبرپاڼې په خپرولو سره ویلي، له څه باندې یوه کال راهیسې نړۍ د غزې په تړانګه کې د بې سارې مرګ ژوبلې او ویجاړیو شاهده ده.
په خبرپاڼه کې راغلي: «د غزې په تړانګه کې د فلسطینیانو په خلاف د اسراییل وحشیانه یرغل په لسګونو زره کسان وژلي، د استوګنې ځایونه او مهم زېربناوې یې ویجاړې کړې او ۱.۹ مېلیونه فلسطینیان یې په زوره بې ځایه کړي دي.»
دغه سازمان وایي، چې په غزه کې یې د اسراییل کړنې څېړلې او د ترلاسه شویو مالوماتو له مخې اسراییل د۲۰۲۳کال د اکټوبر له ۷مې نېټې راهیسې په غزه کې نسل وژنه کوي.
په خبرپاڼه کې راغلي، چۍ په غزه کې د اسراییل د پوځي عملیاتو په ترڅ کې دغه هېواد سیاستونه غوره کړل او داسې اقدامات یې ترسره کړل چې موخه یې په غزه کې فلسطینیانو ته د نه جبرانېدونکي زیان رسول دي.
له بل پلوه حماس رویټرز ته ویلي، چې دوی د احتمالي اوربند او د بندیانو د تبادلې د یوې برخې په توګه د ۳۴ اسراییلي بندیانو نوملړ تصویب کړی.
اسراییل بیا وايي، چې تر اوسه پورې یې نوملړ نه دی ترلاسه کړی، ځکه چې د قطر په دوحه کې غیر مستقیم خبرې روانې دي.
