د کابل په بګرامیو ولسوالۍ کې د (مرغومې ۱۷مه) د طالبانو د پوهنې ریاست له لوري ښوونکو ته د ملا هبت الله د فرمانونو د پلي کولو یو ورځنی سیمینار جوړ کړی و، او په کې یې ورته سپارښتنې کړي، چې د دوی د مشر د فرمانونو پلي کولو په تړاو خلکو ته فکري تبلیغات وکړي.
کابل کې د طالبانو د پوهنې ریاست تدریسي مرستیال مولوي عبدالهادي په یاد سېمینار کې ښوونکو ته ویلي چې د ملا هبت الله فرمانونه داسې پر ځای فرض وګڼئ لکه د خدای تعالی حکمونه چې پر ځان منئ. هغه له ځايي ښوونکو غوښتنه کړې چې د طالبانو د مشر د فرمانونو د پلي کولو لپاره خلکو ته فکري تبلیغات وکړي او له سرغړونو یې راوګرځوي.د پوهنیزو چارو کارپوهان په دې باور دي چې د طالبانو له لوري ښوونځي په بشپړه توګه سیاسي کړای شوي او ښوونکو ته سپارښتنه شوې چې زده کوونکي د طالبانو د پلویتوب پر روحیه روزي.داسې اندیښنې هم شته چې طالبانو په ښوونځیو کې د دوی د افکارو لرونکي ملایان د ښوونکو په توګه ګومارلي، چې په ښوونځیو کې زده کوونکو او ماشومانو ته د طالبانو د بقا لپاره فکري روزنې ورکړي.طالبانو په ټول هېواد کې له شپږم ټولګي پورته د نجونو ښوونځي تړلي او باورونه دا دي چې غواړي چې د خپلو افراطي ملایانو په وسیله د هلکانو د ښوونځیو دننه هم د طالبانو د مدرسو په څېر ذهني چاپېریال رامنځته کړي.
