په واشنګټن کې د اسلام اباد پخواني سفیر حسین حقاني د ټي ټي پي له لوري د پاکستان د اټومي انرژۍ د کارکوونکو د تښتول کېدو په غبرګون کې ویلي چې په دغه هېواد کې ناامني او له قانون څخه سرغړونې مخ په ډېرېدو دي.
دغه پاکستاني ډېپلوماټ ويلي، د پاکستان د اټومي انرژۍ د کارکوونکو تښتول کېدل په دغه هېواد کې د ترهګرۍ د ډېریدو ښکاره بېلګه ده ؛خو واکمن یې د مخنېوي پر ځای په سیاسي جنجالونو بوخت دي.
هغه د پوښتنې په ډول پر خپله اېکس پاڼه لیکلي چې که حکومت او ادارې په سیاسي لانجو کونچو بوختې وي؛ نو د دولت واک به څوک عملي کوي؟
تېره اوونۍ د خېبرپښتونخوا په لکي مروت کې پاکستاني طالبانو د دغه هېواد اټومي انرژۍ ۱۶ کارکوونکي او یو موټر چلوونکی وتښتول؛ خو ۸ تنه یې بېرته وموندل شول او ۸ کسان لا هم د پاکستاني طالبانو په ولکه کې دي.
د اټومي انرژۍ کارکوونکو په یو ویډیوي پېغام کې د پاکستان له حکومت او پوځ څخه غوښتي چې ژر تر ژره دې یې د خلاصون لپاره له طالبانو سره هوکړې ته ورسېږي.
ټي ټي پي د دغو یرغمل شویو کارکوونکو د خوشې کېدو په بدل کې د پاکستان له حکومته د دوی د وروستیو نیول شویو کسانو د خوشې کېدو تر څنګ ځینې نورې غوښتنې کړې دي.
له دې سره هم مهاله په خېبر پښتونخوا کې د ټي ټي پي بریدونو زور اخیستی او پر ځینو سیمو یې ولکه هم ټینګه کړې ده. د خېبر پښتونخوا یو شمېر سیاستوالو د پاکستان پر حکومت او پوځ نیوکې کړي چې د بې غورۍ له امله یې پښتونخوا د ناامنۍ په اور کې سوځي.
