طالبان: په یوه میاشت کې ۶۵ زره جریبه دولتي ځمکه له غاصبینو راګرځول شوې
د طالبانو عدلیې وزارت ویلي، چې په تېره یوه میاشت کې یې د افغانستان په ۱۱ ولایتونو کې له ۶۵ زره جریبو ډېره دولتي ځمکه د غاصیبینو له منګلو راګرځولې ده.
د طالبانو عدلیې وزارت ویلي، چې په تېره یوه میاشت کې یې د افغانستان په ۱۱ ولایتونو کې له ۶۵ زره جریبو ډېره دولتي ځمکه د غاصیبینو له منګلو راګرځولې ده.
یاد وزارت د یوې خبرپاڼې په خپرولو سره ویلي، چې راګرځول شوې ځمکې یې اړوند ادارو ته سپارلې دي.
د خبرپاڼې له مخې، دغې ډلې شاوخوا ۶۵ زره او ۲۲۹ جریبه ځمکه په کندوز، جوزجان، تخار، غزني، غور، پکتيا، خوست، زابل، ميدان وردګ، باميان او پنجشیر ولایتونو کې له ارزولو او په نښه کولو وروسته له غاصیبینو راګرځولې ده.
د دغه وزارت په خبرپاڼه کې دغه راز زیانه شوې، چې ډېره ځمکه په غزني ولایت کې غصب شوې وه، چې ۱۳ زره او ۲۸۵ جریبه وه.
د طالبانو عدلیې وزارت په دغه خبرپاڼه کې راغلي، چې د ځمکو له غصب څخه د مخنیوي تخنیکي پلاوي د هېواد په ۱۸ ولایتونو کې له یو لک و شپږ څلوېښت زره جریبو څخه زیاتې ځمکې په نښه کړې او همدا زار په ۲۹ ولایتونو کې څه باندې څلور نیم لکه جریبه ځمکې د ارزونې لاندې دي.
سره له دې چې تر اوسه د غصب شویو دولتي ځمکو دقیق شمېر معلوم نه دی، خو د تېر حکومت د ښار جوړونې وزارت په ۲۰۱۹ کال کې ویلي وو، چې د ټول هېواد په کچه څه باندې یونیم میلیون جریبه دولتي ځمکه غصب شوې ده.
پر افغانستان د طالبانو له واکمنېدو وروسته یاده ډله وخت نا وخته د غصب شویو ځمکو د راګرځولو خبره کوي.
طالبانو تراوسه دا نه دي ويلي، چې دغه ځمکې د چا لهخوا او کله غصب شوي، خو د یاد وزارت چارواکو مخکې ویلي و، چې هر غاصب چې وزارت غوښتل کېږي د غصب تورونه ردوي.
د طالبانو د عدلیې وزارت تر دې وړاندې هم ویلي و، چې په ټول افغانستان کې له غاصبانو د دولتي ځمکو د بېرته راګرځولو بهیر په چټکۍ سره روان دی.
د دغه وزارت د معلوماتو له مخې، د دولتي ځمکو د غصب د مخنیوي کمېسیون د افغانستان په څلورو زونونو کې ځانګړې محکمې او د ځمکو د پېژندنې او تثبیت پلاوي ګومارلي دي.
دا په داسې حال کې ده، چې په افغانستان کې پخواني جمهوري حکومت هم د حکومتي ځمکو د ثبت او له غصب څخه د خلاصون په برخه کې اقدامات کړي وو.
په ۲۰۱۷ کال کې د افغانستان تېر جمهوري نظام ولسمشر محمد اشرف غني هم د نیول شویو ځمکو د لانجو د حل لپاره د یوې ځانګړې محکمې د جوړولو پرېکړه کړې وه.
څو کاله وړاندې د ازادۍ کور په نامه یوه نادولتي بنسټ ویلي وو، چې د دولتي ځمکو زیاتره غاصبین زورواکي، جهادي قومندانان، قومي مشران، سیاسي او امنيتي چارواکي او د پارلمان یو شمېر غړي دي.
د جرمني د بهرنیو چارو وزارت پر ویب سایټ په یوه مقاله کې چې ظاهرا ددغه هېواد د بهرنیو چارو وزارت رسمي نظر څرګندوي، راغلي، چې د طالبانو له واکمنۍ راهیسې افغان ښځې او نجونې د جدي او منظمو بشري حقونو له سرغړونو سره مخ دي.
مقاله وايي، د طالبانو د حکومت له خوا صادر شوي مختلف فرمانونه، مقررې او نور اقدامات په منظمه توګه ښځې او نجونې له عامه ژونده حذف کړې او د جنسیت پر بنسټ تبعیض سره یې مخ کړې دي.
دغه مقاله چې د جرمني د بهرنیو چارو وزارت دریځ څرګندوي، وايي، د افغانستان ښځې او نجونې له ټولنیز، سیاسي، اقتصادي، او قانوني ژونده محرومې شوې او له خپل کرامت څخه بې برخې شوې دي.
مقاله وايي، « موږ پرله پسې له افغانستان او د طالبانو ډیفکټو حکومت څخه غوښتنه کړې چې د افغانستان نړیوالې حقوقي ژمنې پوره کړي او د ښځو او نجونو پر حقونو ټول محدودیتونه پای ته ورسوي، په ځانګړې توګه د دوی د زده کړو حق محدودیت باید ختم شي. له بده مرغه، وضعیت نه دی ښه شوی، بلکې په اندیښمنوونکي ډول نور هم خراب شوی دی».
مقاله وايي، افغانستان د ملګرو ملتونو د ښځو پر وړاندې د تبعیض له منځه وړو کنوانسیون (CEDAW) غړی پاتې او د طالبانو له واکمنۍ وروسته هم افغانستان د نړیوالو قوانینو له مخې مکلف دی چې د دغه کنوانسیون اصول پلي کړي او له هغو بې شمېره ژمنو د سرغړونو ځواب ورکوونکی دی.
مقاله زیاتوي، « دا دې ته له پام پرته، چې جرمنی د طالبانو ډیفکټو حکومت د افغانستان د قانوني حکومت په توګه په رسمیت نه پېژني، معتبر دی».
د ملګرو ملتونو د ښځو پر وړاندې د تبعیض له منځه وړو کنوانسیون د ښځو د بشري حقونو د ساتنې تر ټولو مهم نړیوال چوکاټ دی. دا لومړی نړیوال حقوقي سند دی چې د ژوند په ټولو برخو کې د ښځو پر وړاندې تبعیض منع کوي او دولتونه اړ باسي چې په قانوني او عملي توګه په ټولو ټولنیزو برخو کې د ښځو د برابر ګډون ډاډمنتیا لپاره ګامونه واخلي.
د جرمني د بهرنیو چارو وزارت وايي، جرمني، اسټرالیا، کاناډا، او هالنډ په ګډه پرېکړه کړې چې افغانستان او د طالبانو ډیفکټو حکومت د ښځو د حقونو په تړاو د ملګرو ملتونو له کنوانسیون نه په سرغړونو مسوول ونیسي.
مقاله وايي، چې دغو هېوادونو د کنوانسیون د شخړو د حل میکانیزم په کارولو سره له افغانستان [طالبانو حکومت] نه رسمي غوښتنه کړې چې خپلې ژمنې عملي کړي.
د جرمني د بهرنیو چارو وزارت مقاله وايي، دا نوښت د ۲۰۲۴ کال د سپټمبر پر ۲۵مه د ملګرو ملتونو د عمومي غونډې په څنډه کې اعلان شو. د دغه نوښت ملاتړ البانیا، اندورا، بلجیم، بلغاریا، چیلي، کروشیا، ډنمارک، فنلنډ، هندوراس، ایرلنډ، ایسلنډ، د کوریا جمهوریت، لاتویا، لیختن شتاین، لوګزامبورګ، ملاوي، مولداویا، مونټینیګرو، مراکش، نیوزیلنډ، رومانیا، سلوانیا، هسپانیا، سویډن او برېتانیا کړی دی.
