ملګري ملتونه وایي جاپان د افغانستان له خلکو سره ۱.۵ میلیون ډالر مرسته کړې

دغه بنسټ د سې شنبې په ورځ د (مرغومي په ۲۵مه) په یو بیان کې ویلي، چې دغه مرسته به د میندوارو میندو، ماشومانو او تنکیو ځوانانو د روغتیایي خدمتونو په برخو کې د کندهار، ننګرهار او فاریاب په ولایتونو کې ولګول شي.
له افغانستان سره د جاپان مرسته داسې مهال شوې چې د دغه هېواد خلک د ژمي په سړو سیلیو کې له ګڼو ستونزو او کړاوونو سره مخامخ شوي دي،
تر دې وړاندې د خوړو نړیوال پروګرام (ډبلیو ایف پي) د اندیښنې په څرګندولو سره ویلي و چې دغه بنسټ په افغانستان کې د بېوزلو د لاسنیوي لپاره ۷۱۸ ملیون ډالرو ته اړتیا لري.
له هغه مهاله چې طالبان په افغانستان کې واک ته رسیدلي، ګڼو خلکو خپل کار او روزګار له لاسه ورکړی او له سختو اقتصادي ستونزو سره مخامخ شوي دي.
د دې تر څنګ د دغې ډلې له خوا پر نجونو او ښځو د لګیدلو بندیزونو له امله نړیوالې مرستې هم کمې شوې چې ورسره خلک د سختې لوږې او اقتصادي کړکېچ سره مخامخ شوي دي.
جاپان تر دې وړاندې هم د ملګرو ملتونو دوګړو له صندوق سره مرسته کړې وه.