بېنېټ په کابل کې د یوه مدني فعال د مړینې په اړه د څېړنو غوښتنه وکړه
د ملګرو ملتونو ځانګړي راپور ورکوونکي ریچارډ بېنېټ له طالبانو څخه په کابل کې د یوه مدني فعال حمزه الفت د مړینې په اړه د څېړنو او ځواب ویلو غوښتنه وکړه.
د ملګرو ملتونو ځانګړي راپور ورکوونکي ریچارډ بېنېټ له طالبانو څخه په کابل کې د یوه مدني فعال حمزه الفت د مړینې په اړه د څېړنو او ځواب ویلو غوښتنه وکړه.
حمزه الفت د طالبانو له بند څخه تر خوشې کېدو وروسته په خپل کور کې مړ شوی دی.
تر اوسه د نوموړي د مړینې علت روښانه نه دی.
یاد مدني فعال د ۱۴۰۱ کال د سلواغې په ۲۰مه د کابل په دشت برچي سیمه کې د طالبانو له خوا نیول شوی و او ویل کېږي، چې شاوخوا دوه کاله د طالبانو په بند کې وو.د راپورونو له مخې، نوموړی له بند څخه تر خوشې کېدو وروسته له افغانستانه وتلی و، خو بېرته هېواد ته ستون شوی و.د الفت کورنۍ ته نږدې سرچینه وایي، چې الفت درې میاشتې مخکې د طالبانو د استخباراتو له خوا تر نیول کېدو وروسته سخت وهل شوی وو.بېنېت د یکشنبې په ورځ په خپل اېکس کې لیکلي، چې د الفت د مړینې څرنګوالی په کلکه د اندېښنې وړ دی او په دې اړه یې د طالبانو د څېړنو غوښتنه وکړه.د افغانستان انټرنشنل د معلوماتو له مخې، طالبانو له حمزه الفت څخه غوښتي و، چې د خپل وضعیت په اړه یې له رسنیو سره خبرې و نه کړي.حمزه الفت په کابل کې له پېژندل شویو مدني فعالانو څخه و، چې د ښځو په اعتراضونو کې یې هم اغېزمن رول درلود.د نوموړي مړینې په افغانستان کې د بشري حقونو او د مدني ټولنې د فعالانو د ځپلو په برخه اندېښنې زیاتې کړي دي.دا په داسې حال کې ده، چې طالبانو په تېرو څه باندې درېیو کلونو کې د معترضو ښځو په ګډون سلګونه مدني فعالان او خبریالان نیولي او شکنجه کړي دي.طالبان بیا د مدني فعالانو ځپل او شکنجه کول ردوي، خو د نیول شویو فعالانو شهادت د دې ښکارندویي کوي، چې د طالبانو په بندخونو کې شکنجې پراخې او وحشیانه دي.
