د ملګرو ملتونو له ماشومانو د ملاتړ صندوق (یونیسف) ویلي، چې په افغانستان کې د هوا په سړېدو سره په ماشومانو کې د تنفسي ناروغیو ګواښ مخ په لوړ روان دی. دغه سازمان وايي، هڅه یې دا ده چې په دې برخه کې لازم ګامونه واخلي.
د ملګرو ملتونو له ماشومانو د ملاتړ صندوق یونیسف وايي، چې په افغانستان کې د هوا په سړېدو سره په ماشومانو کې تنفسي ناروغۍ زیاتې شوې دي او په خبره یې دغه ګواښ مخ په لوړېدو دی.
یاد سازمان په دې اړه د ناروغانو شمېرې نه دي وړاندې کړې خو وايي، چې له خپلو شریکانو سره په ګډه د افغانستان په ګوټ، ګوټ کې روغتونونو ته د درملو او نورو تجهیزاتو په لېږلو بوخت دي.
په افغانستان کې د سخت ژمي، واورو او سړې هوا له امله هر کال په ماشومانو او ډېر عمر لروونکو کسانو کې تنفسي ناروغي زیاتیږي او د مړینې کچه هم په داسې موسم کې لوړیږي.
د طالبانو د روغتیا وزارت چارواکو ویلي، چې د افغانستان په نږدې درې سوه ولسوالیو کې روغتیايي مرکزونه نه لري او هلته روغتيايي خدمتونه کمزوري دي.
که څه هم نړۍوالې روغتیايي ادارې په دې برخه کې هڅې کوي خو طالبانو تر اوسه پورې دغو ستونزو ته د یوې مسوولې ادارې په توګه رسیدنه نه ده کړې.
تر دې وړاندې د ملګرو ملتونو له ماشومانو د ملاتړ صندوق د مرغومي په اوومه نېټه په یوه خبرپاڼه کې ویلي و، چې روان کال یې په ټول افغانستان کې د خوارځواکۍ پر وړاندې ځانګړې هڅې کړې او څلور لکه او ۷۵ زره ماشومانو ته مغذي خواړه وېشلي دي.
په خبرپاڼه کې راغلي چې یونیسف د ۳۳۰۰ خدماتي مرکزونو له لارې د افغانستان په ګوټ، ګوټ کې کوچنیانو ته ویټامین لرونکي خواړه او پروټین ورکړي، چې له خوارځواکۍ وژغورل شي.
