د افغانستان د ولسي جرګي پخوانۍ غړۍ شکریه بارکزۍ د جرمونو د نړیوالې محکمې له لوري د مولوي هبت الله اخوندزاده او عبدالحکیم حقاني د نیولو لپاره د جلب غوښتنې ته په غبرګون وايي:«دا یو ښه پیل دی او دا لړۍ باید دوام پیدا کړي.»
اغلې بارکزۍ د جرمونو د نړیوالې محکمې له لوري د طالبانو د مشر مولوي هبت الله اخوند زاده او د دې ډلې د لوړپوړي قاضي عبدالحکیم حقاني د نیولو د حکم تر صادرولو وروسته افغانستان انټرنشنل ته وویل؛ نن په رښتیا هم د افغانستان د خلکو او په ځانګړي ډول د ښځو لپاره یوه تاریخي ورځ ده. «هغه ښځې چې په جلا وطنۍ کې یا هغوی چې په داخل د افغانستان کې د طالبانو تر دورو لاندې دي، بالاخره نن د دې شاهدان دي چې نه یوازې یې د طالبانو رهبر محکمې ته راکش کړ بلکي، د هغه په وړاندې داسې فرمان هم وړاندې شو چې هغه یو جنایتکار او د بشري حقونو سرغړونکی وپيژندل شو.»
نوموړې وايي، چې د جرمونو د نړیوالې محکمې له لوري دا لړۍ دوام پیدا کړي.« په افغانستان کې موږ ډیر جنایتکاران لرو، زه هیله لرم چې په نړیوالو محکمو کې عدالت د یو اصل په توګه په نړۍ کې وځلیږي.»
شکریه بارکزی وایي، هغه کسان چې په افغانستان کې د بشري سرغړونو، جنسیتي تبعیض او د ښځو د حقونو پایمالونکي دي باید د خپلو کړنو بیه پرې کړي.«هغوی چې په حقیقت کې د دغه جنایت سرچینه دي باید بیه یې پري کړي، زه هیله لرم چې د نړړۍ هېوادونه هم په دې اړه همغږي اوسي او دا یو ښه پیل دی.»
نوموړې وايي، له شاوخوا درېیو کلنو دوامدارو مبارزو وروسته وتوانیدل چې عدالت ترلاسه کړي.«نږدې درې کاله دوامداره عدالت غوښتنې، دروازه په دروازه ټکول، نړیوال ادرسونه ویښول، په دې اړه ویناوي کول او بالاخره اسناد راټولول، موږ وتواندیدو چې عدالت ترلاسه کړو.»
شکریه بارکزۍ چې د جرمونو د نړیوالې محکمې له یادې پرېکړې ډیره خوښه ده وايي؛ موږ وښودل د افغانستان ښځې ان له هېواده بیرون کولی شي د افغانستان د نوي سیاسي ژوند په اړه په افغانستان او نړۍ کې ګټورې ثابتې شي.
د افغانستان د ولسي جرګي پخوانۍ غړې وايي، د افغانستان په تاریخ کې مولوي هبت الله اخوندزاده او عبدالحکیم حقاني لومړني اسلامي سختدریځه کسان دي چې د جرمونو د نړیوالې محکمې له لوري یې د نیولو حکم صادر شو او دا د عدالت خوښوونکو لپاره یوه لویه لاسته راوړنه ده.
