د طالبانو کډوالو او بېرته راستنېدونکو چارو وزارت په یوې خبرپاڼې کې ویلي، چې اروپايي ټولنې ورسره د ۴۷ میلیون یورو مرستې ژمنه کړې ده. خو اروپايي ټولنې لا په دې اړه معلومات نه دي خپاره کړي.
د طالبانو کډوالو او بېرته راستنېدونکو چارو وزارت تېره شپه ناوخته د یوې خبرپاڼې په خپرولو سره ویلي، چې اروپايي ټولنې ورسره د ۴۷ میلیون یورو مرستې ژمنه کړې خو اروپايي ټولنې له خپل ادرس څخه لا په دې اړه معلومات نه دي ورکړي.خبرپاڼه کې راغلي، چې د طالبانو د کډوالو او بېرته راستنېدونکو چارو سرپرست مولوي عبدالکبیر د اروپايي ټولنې له شارژدافیرې ویرونیکا بوسکوویچ پوهار او ورسره پلاوي سره کتلي او د افغانستان د ستونزو په اړه یې ورسره خبرې کړي دي.د طالبانو په خبرپاڼه کې د اروپايي ټولنې د شارژدافیرې له قوله لیکل شوي، چې د افغان کډوالو لپاره یې ۴۷ میلیونه یورو مرسته اعلان کړې، چې د زدهکړو، خوراکي توکو، پاکو اوبو او روغتیايي خدمتونو په برخو کې به ولګول شي.په خبرپاڼه کې د هغې له قوله په ټینګار سره ویل شوي، چې طالبان دې د دغو مرستو په عادلانه وېش او لګولو کې همکاري ورسره وکړي.د طالبانو په خبرپاڼه کې د اروپايي ټولنې د شارژدافیرې ویرونیکا بوسکوویچ پوهار له قوله ویل شوي، چې اروپايي ټولنه او د هغوی شریک بنسټونه د افغان کډوالو لپاره د روغتیايي سکتور، زدهکړو، کاروبار، خوراکي توکو او نورو برخو لپاره د ۱۱۳ میلیونه یورو مرسته ځانګړې کړې ده.طالبانو په دغې ناسته کې له اروپايي ټولنې غوښتي چې په ژمي کې دې د افغان کډوالو لپاره د خوراکي توکو او نورو بشري مرستو ته لومړیتوب ورکړي.تېره اوونۍ اروپایي ټولنې د افغان کډوالو د ملاتړ په موخه ۳۶ ملیونه یورو مرسته اعلان کړه. د دغې مرستې تړون د هرات په اسلام کلا کې، د افغانستان لپاره د اروپایي ټولنې د شارزدافیرې ویرونیکا بوسکوویچ پوهار او په افغانستان کې کډوالو لپاره د ملګرو ملتونو د عالي کمیشنرۍ د استازي عرفات جمال تر منځ لاسلیک شو.خو دا لا نه ده څرګنده چې هغه ۳۶ میلیون یورو مرسته د دغې اعلان شوې ۴۷ میلیون یورو برخه ده او که هغه په افغانستان کې د مرستو جلا برخه ده.
