د حالوش په نوم د بشری حقوقو سازمان وايي، چې د ایران حکومت یو افغان وګړی د هغه د کورنۍ له خبرېدو پرته اعدام کړی دی. ایران د تېر ۲۰۲۴ کال په ډیسمبر میاشت کې د نهو افغانانو په ګډون ۱۳۸ زندانیان اعدام کړي دي.
د حالوش په نوم د بشری حقوقو سازمان نن پنجشنبه د (سلواغې څلورمه) د یوې خبرپاڼې په خپرولو سره ویلي، چې د ایران حکومت د دغه هیواد په بندر عباس زندان کې یو افغان وګړی اعدام کړی.
د حالوش په وینا، لږ تر لږه یو افغان بندي، چې تر دې مخکې د نشهیي توکو اړوند تورونو له امله په اعدام محکوم شوی و، د ۱۴۰۳ کال د سلواغې په دویمه، د سې شنبې په ورځ سهار وختي د بندر عباس په زندان کې اعدام شوی.
د دغه اعدام شوي افغان وګړي هویت، ۴۳ کلن سردار محمد د افغانستان د فراه ولایت د خاک سفید ولسوالۍ اوسېدونکی یاد شوی او ویل شوي چې یو زوی لري.
د هغو بندیانو اعدامول چې د «مخدره توکو د قاچاقو او قصدي وژنو» په تورونو اعدام شوي، له تېرو څلورو کلونو راهیسې په پرله پسې توګه او هر کال زیات شوي دي. د ۲۰۲۲ پرتله، چې ۲۵۶ کسان د «مخدره توکو د قاچاق» په تور اعدام شوي، په ۲۰۲۳ کې ۸۴ سلنه زیاتوالی په کې راغلی او په دې لړ کې ۴۷۱ اعدامونه ثبت شوي.
پر بشري حقونو د څار سازمان هم په ایران کې د اعدام سزا پر ډیروالي اندېښنه ښودلې او د دغې سزا د لغوه کېدو غوښتنه یې کړې.
د ایران حکومت له بې شمېره نړۍوالو بندیزونو او فشارونو سره، سره په زندانونو کې د ایراني، بلوڅو، افغانانو او د ځینو بهرنیو وګړو اعدامولو لړۍ روانه ساتلې ده.
